8న జమ్మూలోని శ్రీవారి ఆలయ మహా సంప్రోక్షణ

తిరుమల, న్యూస్‌టుడే: జమ్మూలోని మజీన్‌ గ్రామంలో తితిదే నిర్మించిన శ్రీ వేంకటేశ్వరస్వామి ఆలయ మహా సంప్రోక్షణ కార్యక్రమం జూన్‌ 8న జరగనుంది. ఇందు కోసం 3వ తేదీ నుంచి వైదిక కార్యక్రమాలు నిర్వహిస్తారు. 8న ఉదయం 7.30-8.15 గంటల వరకు మిథున లగ్నంలో మహా సంప్రోక్షణ ఉంటుంది. 9.30 గంటల నుంచి భక్తులకు స్వామివారి దర్శనం ప్రారంభమవుతుంది. అదే రోజు సాయంత్రం 5 గంటలకు శ్రీవారి కల్యాణాన్ని నిర్వహిస్తారు. సర్వాంగ సుందరంగా తితిదే ఈ ఆలయ నిర్మాణాన్ని పూర్తి చేసింది. వైష్ణోదేవి దర్శనం కోసం జమ్మూ వచ్చే భక్తులకు శ్రీవారి ఆలయం కొత్త ఆధ్యాత్మిక అనుభూతిని ఇవ్వనుంది.