దేవాదాయశాఖ బదిలీల్లో సిఫార్సుల జాతర

అయిదేళ్లు దాటినా బదిలీ చేయొద్దని కొందరు
గత ఏడాదే మార్చినా, పాత పోస్టుకు పంపాలని మరికొందరు
అమాత్యులు, ఎమ్మెల్యేల లేఖలతో కమిషనరేట్‌పై ఒత్తిళ్లు

ఈనాడు, అమరావతి: దేవాదాయశాఖలో బదిలీల కోసం అధికారులు, ఉద్యోగులు సిఫార్సు లేఖలతో ఆ శాఖ కమిషనరేట్‌లో పెద్దఎత్తున ఒత్తిళ్లు చేస్తున్నారు. సుదీర్ఘకాలంగా పని చేస్తున్నవాళ్లు.. అక్కడే ఉంటామని, మరికొందరు బదిలీలకు అర్హులు కాకపోయినా మార్చాలని కోరుతున్నారు. రాష్ట్రవ్యాప్తంగా గ్రేడ్‌-1, 2, 3 ఆలయాల ఈవోలు, సహాయ కమిషనర్లు, ప్రధాన ఆలయాల్లో పనిచేసే ఉద్యోగుల బదిలీల ప్రక్రియ విజయవాడలోని ఆ శాఖ కమిషనరేట్‌లో జరుగుతోంది. ఒకేచోట అయిదేళ్లు దాటి పనిచేస్తున్న వారి వివరాలను సేకరించి, జాబితా సిద్ధం చేశారు. ఆ జాబితాలో ఉన్నవారిలో కొందరు తమ సొంత స్థానాల్లోనే కొనసాగేందుకు లాబీయింగ్‌ మొదలుపెట్టారు. సిఫార్సు లేఖలతో కమిషనరేట్‌కు క్యూ కట్టారు. కొందరు నాలుగైదు సిఫార్సు లేఖలు ఇచ్చి, ఆయా నేతలతో ఫోన్లు కూడా చేయిస్తున్నారు.

* పలు ఆలయాలు, చౌల్ట్రీల ఈవోలు అయిదేళ్లకు పైగా పనిచేస్తున్నారు. వారిలో కొందరు అక్కడి నుంచి కదలకుండా ఉండేందుకు విశ్వప్రయత్నాలు చేస్తున్నారు.
* భీమవరంలో ఓ చౌల్ట్రీ ఈవో 12 ఏళ్లుగా పనిచేస్తున్నారు. ఉమ్మడి కృష్ణా జిల్లాలో వివిధ ఆలయాల ఈవోలు సైతం అయిదేళ్లకు పైగా ఉన్నారు. వీరంతా అక్కడే కొనసాగాలని చూస్తున్నారు.

* సహాయ కమిషనర్లు పూర్తిస్థాయిలో లేకపోవడంతో కొందరు గ్రేడ్‌-1 ఈవోలు, వివిధ ముఖ్య ఆలయాల సహాయ కమిషనర్లుగా ఉండగా.. ఇప్పుడు కదలకుండా ఉండేందుకు ప్రయత్నిస్తున్నారు.

* ఓ పోస్టులో ఉండి.. రెండేళ్లూ పూర్తి కానివారిని బదిలీ చేయొద్దని మార్గదర్శకాలు ఉన్నాయి. అయినా గత ఏడాది బదిలీ అయినవారిలో పలువురు మళ్లీ తమ పాత స్థానాలకు వెళ్లేందుకు సిఫార్సు లేఖలు అందజేశారు.

* నిబంధనల ప్రకారం బదిలీ చేయాలా.. సిఫార్సులకు తలొగ్గాలా.. అనేది అర్థంకాక కమిషనరేట్‌ అధికారులు తలపట్టుకున్నారు. బుధవారం రాత్రి వరకూ ఈ తంతు జరుగుతూనే ఉంది.