వంతెన ప్రమాదకరం.. వదలని ప్రచారం!

వంతెన శిథిలమై.. ఓ వైపు రెయిలింగ్‌ కూలిపోతోంది. ఆ మార్గంలో వెళ్లే వాహనదారులు ప్రమాదాలకు గురవుతున్నారు. ఇవేం పట్టని వైకాపా నాయకులు అదే రెయిలింగ్‌ దిమ్మెలకు పార్టీ జెండా రంగులు వేశారు. కృష్ణా జిల్లా తోట్లవల్లూరు మండలం పెనమకూరు గ్రామంలో బందరు కాల్వపై ఈ శిథిల వారధి ఉంది. సగం రెయిలింగ్‌ కూలిపోయింది. దాని మీది నుంచే దేవరపల్లి, చాగంటిపాడు, పెనమకూరు గ్రామాల ప్రజలు రాకపోకలు సాగిస్తుంటారు. ఇటు నుంచే రైతులు చెరకును ఉయ్యూరులోని ఫ్యాక్టరీకి తరలిస్తారు. అప్పుడప్పుడు వాహనాలు కాల్వలో పడుతుండటం వల్ల స్థానికులే చొరవ తీసుకొని తాటి మొద్దును అడ్డుగా పెట్టుకున్నారు. ప్రమాదకరంగా ఉన్న వంతెనను మరమ్మతులు చేయించాల్సిన నాయకులు రంగులతో సరిపెట్టడమేంటని స్థానికులు ప్రశ్నిస్తున్నారు. 

ఈనాడు, అమరావతి