సరిహద్దు ఆసుపత్రులను అప్రమత్తం చేయాలి

అంబులెన్సులను సిద్ధంగా ఉంచాలి
రైలు ప్రమాదంపై సీఎం జగన్‌ ఉన్నతస్థాయి సమీక్ష

ఈనాడు, అమరావతి: ఒడిశాలో జరిగిన రైలు ప్రమాదంలో మృతులు, క్షతగాత్రుల్లో రాష్ట్రానికి చెందినవారు ఉన్నారా అనే వివరాలను వెంటనే సేకరించాలని ముఖ్యమంత్రి వైఎస్‌ జగన్‌మోహన్‌రెడ్డి అధికారులను ఆదేశించారు. ఎలాంటి సహాయ సహకారాలను అందించేందుకైనా సిద్ధంగా ఉండాలన్నారు. అత్యవసర సేవల కోసం ఒడిశా సరిహద్దులోని మన రాష్ట్రానికి చెందిన ఆసుపత్రులను అప్రమత్తం చేయాలని, అవసరమైతే ఘటనాస్థలికి పంపేందుకు అంబులెన్సులను సిద్ధంగా ఉంచాలన్నారు. రైలు ప్రమాదంపై శనివారం ఆయన ఉన్నతస్థాయి సమీక్ష నిర్వహించారు. ఘటనాస్థలానికి మంత్రి అమర్‌నాథ్‌ నేతృత్వంలో ముగ్గురు ఐఏఎస్‌ల బృందం వెళ్లాలని సీఎం ఆదేశించారు. ‘సంబంధిత కలెక్టర్‌ కార్యాలయాల్లో విచారణ కేంద్రాలను ఏర్పాటు చేయాలి. ప్రయాణికుల పరిస్థితులపై ఆరా తీయడానికి, ఎవరైనా ప్రయాణికుల బంధువులు, సంబంధీకుల నుంచి సమాచారం వస్తే వెంటనే స్పందించడానికి ఈ కేంద్రాలు పని చేయాలి’ అని సీఎం చెప్పారు. అంతకు ముందు రైలు ప్రమాదంపై సీఎం జగన్‌ ట్వీట్‌లో తీవ్ర దిగ్భ్రాంతి ప్రకటించారు.

బాలేశ్వర్‌ ఆసుపత్రిలో క్షతగాత్రులకు మంత్రి అమర్‌నాథ్‌ పరామర్శ

విశాఖపట్నం, న్యూస్‌టుడే: ఒడిశాలో రైలు ప్రమాదంలో గాయపడి బాలేశ్వర్‌ ఆసుపత్రిలో చికిత్స పొందుతున్న ఆంధ్రప్రదేశ్‌ ప్రయాణికులను రాష్ట్ర పరిశ్రమలు, ఐటీ శాఖల మంత్రి గుడివాడ అమర్‌నాథ్‌ పరామర్శించారు. శనివారం ఆసుపత్రికి చేరుకున్న ఆయన వైద్యులతో మాట్లాడి క్షతగాత్రుల ఆరోగ్య పరిస్థితిని తెలుసుకున్నారు. ఇప్పటివరకు రాష్ట్రానికి చెందిన 11 మంది క్షతగాత్రులను గుర్తించామని మంత్రి చెప్పారు.