46,445 కనెక్షన్లకు ఆక్వా విద్యుత్తు రాయితీ

‘ఈనాడు’ కథనంపై వివరణ ఇచ్చిన ఇంధనశాఖ

ఈనాడు, అమరావతి: రాష్ట్రంలోని మొత్తం 63,754 ఆక్వా విద్యుత్తు కనెక్షన్లలో 46,445 కనెక్షన్లకు రాయితీకి అర్హత ఉందని గుర్తించినట్లు ఇంధనశాఖ ఒక ప్రకటనలో తెలిపింది. ‘ఆక్వా రైతు బరువయ్యాడా?’ శీర్షికన శనివారం ‘ఈనాడు’ ప్రధాన పత్రికలో వచ్చిన కథనంపై ఆ శాఖ వివరణ ఇచ్చింది. ప్రస్తుత ప్రభుత్వం అధికారంలోకి వచ్చాక జులై 2019 నుంచి అన్ని ఆక్వా కనెక్షన్లకు యూనిట్‌ విద్యుత్తును రూ.1.50కు సరఫరా చేయగా.. 2022 జులై నుంచి ఆక్వా జోన్లలో పదెకరాలలోపు చెరువులకే రాయితీ విద్యుత్తు అందించాలని ప్రభుత్వం ఉత్తర్వులు ఇచ్చిందని పేర్కొంది. పదెకరాల పైబడి విస్తీర్ణమున్న 17,309 కనెక్షన్లకు యూనిట్‌ రూ.3.85 చొప్పున సరఫరా చేస్తున్నామని తెలిపింది.