సర్వదర్శనానికి 24 గంటలు

తిరుమల, న్యూస్‌టుడే: శ్రీవారి దర్శనానికి తిరుమలకు వస్తున్న భక్తుల సంఖ్య భారీగా ఉంది. శనివారం సాయంత్రానికి ఎస్‌ఎస్‌డీ టోకెన్లు లేకుండా క్యూ లైన్‌ల్లో వచ్చిన భక్తులతో వైకుంఠం క్యూ కాంప్లెక్స్‌-2లోని కంపార్ట్‌మెంట్లు, నారాయణగిరి షెడ్లు నిండిపోయాయి. మిగిలిన భక్తులు కృష్ణతేజ అతిథి గృహం వరకు క్యూ లైన్‌లో వేచి ఉన్నారు. వీరికి దాదాపు 24 గంటల్లో శ్రీవారి దర్శనం లభించనుందని తితిదే తెలిపింది. శ్రీవారిని శుక్రవారం 76,963 మంది దర్శించుకున్నారు. రూ.2.97 కోట్ల హుండీ కానుకలు లభించాయి. 37,422 మంది తలనీలాలు సమర్పించారు.