మూడు చోట్ల భూ సేకరణ ప్రతిపాదనల ఉపసంహరణ

విజయవాడ మెట్రో రైల్‌ ప్రాజెక్టుపై ఉత్తర్వులు

ఈనాడు, అమరావతి: విజయవాడ మెట్రో రైల్‌ ప్రాజెక్టు నిర్మాణానికి భూ సేకరణ కోసం ప్రతిపాదించిన భూములను ప్రభుత్వం మరో మూడు చోట్ల ఉపసంహరించుకుంది. ఇందుకు సంబంధించి ఎన్టీఆర్‌ జిల్లా కలెక్టర్‌ ఢిల్లీరావు పేరుతో శనివారం వేర్వేరుగా గెజిట్‌ నోటిఫికేషన్లు వెలువడ్డాయి. విజయవాడ అర్బన్‌ మండలం గుణదలలో 4,455.19 చ.గజాలు, మాచవరంలో 1,990.22 చ.గజాలు, మొగల్రాజపురంలో 2,857.64 చ.గజాల స్థలాన్ని భూ సేకరణ ప్రతిపాదనల నుంచి ఉపసంహరించినట్లు కలెక్టర్‌ పేర్కొన్నారు. ఇదే ప్రాజెక్టుకు సంబంధించి విజయవాడ గ్రామీణ మండలంలోని ఎనికేపాడు గ్రామ పరిధిలో 3,272.55 చదరపు గజాల భూ సేకరణ ప్రతిపాదనను ప్రభుత్వం గత నెల 29న ఉపసంహరించుకున్న విషయం తెలిసిందే.