శాఖాపరమైన విచారణ లేకుండా చర్యలు సరికాదు

స్పష్టంచేసిన హైకోర్టు
ఓ ఉద్యోగికి 1987లో విధించిన శిక్ష రద్దు

ఈనాడు, అమరావతి: ఛార్జి మెమో ఇవ్వకుండా, శాఖాపరమైన విచారణ చేయకుండా ఆరోపణలు ఎదుర్కొంటున్న ఉద్యోగికి నేరుగా శిక్ష విధించడం సరికాదని, ఇలా చేయడం సర్వీసు నిబంధనలకు, సహజ న్యాయ సూత్రాలకు విరుద్ధమని హైకోర్టు తేల్చిచెప్పింది. కేవలం సంజాయిషీ నోటీసు ఇచ్చి.. దానికి ఇచ్చిన వివరణ సంతృప్తిగా లేదని ఓ ఉద్యోగికి రెండు ఇంక్రిమెంట్లను నిరవధికంగా నిలుపుదల చేస్తూ అధికారులు 1987 నవంబర్‌ 9న విధించిన శిక్షను రద్దు చేసింది. ఆ ఉద్యోగి సర్వీసు ప్రయోజనాలు పొందేందుకు అర్హుడని స్పష్టం చేసింది. హైకోర్టు న్యాయమూర్తులు జస్టిస్‌ సీహెచ్‌ మానవేంద్రనాథ్‌రాయ్‌, జస్టిస్‌ వి.గోపాలకృష్ణారావుతో కూడిన ధర్మాసనం ఇటీవల ఈ మేరకు తీర్పు ఇచ్చింది. 36 ఏళ్ల కిందట అధికారులు విధించిన శిక్షను హైకోర్టు ఇప్పుడు రద్దు చేసింది. మరోవైపు శిక్ష విధింపు సమయంలో ఆ ఉద్యోగికి 31 ఏళ్లుకాగా.. ప్రస్తుతం 67 ఏళ్లు.

* పట్టు పరిశ్రమశాఖలో ఇన్‌స్పెక్టర్‌గా సీహెచ్‌ లక్ష్మీనరసయ్య పనిచేస్తుండగా ఆయన సేవలు సంతృప్తిగా లేవని అధికారులు షోకాజ్‌ నోటీసు ఇచ్చారు. లక్ష్మీనరసయ్య ఇచ్చిన వివరణ సరిగా లేదని, ఇంక్రిమెంట్లో కోత విధించారు. 1987లో విధించిన ఈ శిక్షను సవాలు చేస్తూ ఆయన అధికారుల ముందు అప్పీల్‌, రివిజన్‌ దాఖలు చేశారు. వాటిని అధికారులు తోసిపుచ్చారు. దీంతో 2005లో ఏపీ పరిపాలన ట్రైబ్యునల్‌ను ఆశ్రయించగా 2006లో పిటిషన్‌ను కొట్టేసింది. దానిని సవాలుచేస్తూ 2015లో హైకోర్టును ఆశ్రయించారు. ఇటీవల విచారణ జరిపిన హైకోర్టు.. ఏపీఏటీ ఉత్తర్వులను రద్దు చేసింది. పిటిషన్‌దారు అన్ని ఆర్థిక ప్రయోజనాలకు అర్హులని స్పష్టంచేసింది.