తెదేపా ర్యాలీలో ఉద్రిక్తత

మహిళలను నెట్టివేసిన పోలీసులు

ఈనాడు, విశాఖపట్నం: విశాఖ ఆరిలోవ నియోజకవర్గంలో తెదేపా నేతలు శనివారం రాత్రి చేపట్టిన కొవ్వొత్తుల ర్యాలీ ఉద్రిక్తతకు దారితీసింది. ఎమ్మెల్యే రామకృష్ణబాబు ఆధ్వర్యంలో ఈ కార్యక్రమం చేపట్టగా అధిక సంఖ్యలో పార్టీ శ్రేణులు తరలివచ్చాయి. అనుమతి లేకుండా ర్యాలీ చేయకూడదని ఎమ్మెల్యే, ఇతర నాయకులతో పోలీసులు వాగ్వాదానికి దిగారు. అయినప్పటికీ ముందుకెళ్తున్న మహిళలను పోలీసులు లాఠీలను అడ్డుపెట్టి నెట్టడంతో కొందరు కిందపడ్డారు. ఓ మహిళకు గాయమైంది. పురుష పోలీసులు మహిళలను నెట్టడం ఏమిటని వారు ప్రశ్నించారు.