ప్రస్తుత చట్టాల రద్దు తగదు

ఐలు జాతీయ అధ్యక్షుడు వికాస్‌రంజన్‌ భట్టాచార్య 

విజయవాడ(భవానీపురం), న్యూస్‌టుడే: ప్రస్తుతం అమల్లో ఉన్న చట్టాలను కేంద్ర ప్రభుత్వం రద్దు చేసి కొత్తవాటిని రూపొందించడం తగదని ఆలిండియా లాయర్స్‌ యూనియన్‌(ఐలు) జాతీయ అధ్యక్షుడు, ఎంపీ వికాస్‌ రంజన్‌ భట్టాచార్య పేర్కొన్నారు. ఐలు జాతీయ కౌన్సిల్‌ సమావేశాన్ని విజయవాడలో శనివారం నిర్వహించారు. ఈ సందర్భంగా వికాస్‌ రంజన్‌ భట్టాచార్య మాట్లాడుతూ పాత చట్టాల స్థానంలో కేంద్ర ప్రభుత్వం కొత్త బిల్లులను ప్రవేశపెట్టడం అంటే విలువైన మానవ వనరులను వృథా చేయడమేనన్నారు. ఇది న్యాయ సౌభ్రాతృత్వానికి, దేశ ప్రజలకు తీవ్ర అపచారమని పేర్కొన్నారు. ఐలు ఏపీ రాష్ట్ర కమిటీ అధ్యక్షుడు సుంకర రాజేంద్రప్రసాద్‌ మాట్లాడుతూ.. న్యాయవాదులు ఎదుర్కొంటున్న సమస్యలపై ఈ ఏడాది డిసెంబరు 28, 29, 30 తేదీల్లో కోల్‌కతాలో ఆలిండియా మహాసభలు నిర్వహించాలని నిర్ణయించినట్లు తెలిపారు. మహిళలకు చట్టసభల్లో రిజర్వేషన్లు వెంటనే అమలు చేయాలని, యూనిఫాం సివిల్‌ కోడ్‌ అవసరం లేదని సమావేశంలో తీర్మానించినట్లు చెప్పారు. సమావేశంలో కమిటీ రాష్ట్ర ప్రధాన కార్యదర్శి నల్లూరి మాధవరావు, సీనియర్‌ న్యాయవాది పి.వి.సురేంద్రనాథ్‌, చౌహాన్‌, న్యాయవాదులు పాల్గొన్నారు.