చంద్రబాబు అరెస్టుకు నిరసనగా విదేశాల్లో ఆందోళనలు

ఈనాడు డిజిటల్‌, అమరావతి : తెదేపా అధినేత చంద్రబాబు అరెస్టుకు నిరసనగా వివిధ దేశాల్లో ఆందోళనలు కొనసాగుతున్నాయి. చంద్రబాబును తక్షణం విడుదల చేయాలని డిమాండ్‌ చేస్తూ అక్కడి తెలుగువారు, ఐటీ ఉద్యోగులు నిరసన ప్రదర్శనలు చేస్తున్నారు. తెదేపా ఎన్నారై విభాగం ఆధ్వర్యంలో శుక్రవారం బహ్రెయిన్‌లో ప్రవాసాంధ్రులు నిరసన తెలిపారు. ‘చంద్రబాబును రిమాండ్‌లో ఉంచడం అన్యాయం, చంద్రబాబు అంటేనే అభివృద్ధి..సంక్షేమం’ అంటూ పెద్ద ఎత్తున నినాదాలు చేశారు. ‘సైకో పోవాలి..సైకిల్‌ రావాలి’ అని ఉన్న ప్లకార్డులు ప్రదర్శించారు. కువైట్‌లో ఎన్నారై తెదేపా, జనసేన సమాఖ్యల సంయుక్త ఆధ్వర్యంలో ‘వియ్‌ స్టాండ్‌ విత్‌ సీబీఎన్‌’ కార్యక్రమాన్ని నిర్వహించారు.

•  పశ్చిమ ఆఫ్రికాలోని టాంజానియా దేశ ఆర్థిక రాజధాని దార్‌ ఎస్‌ సలాంలో అక్కడి తెలుగువారు కొవ్వొత్తుల ప్రదర్శన నిర్వహించారు. రాజకీయ కక్ష సాధింపులో భాగంగానే చంద్రబాబుపై అక్రమకేసులు బనాయించి జైలుకు పంపారని ధ్వజమెత్తారు. ‘వీ స్టాండ్‌ విత్‌ సీబీఎన్‌’ అని ఉన్న ఫ్లెక్సీ ధరించి శుక్రవారం ర్యాలీ నిర్వహించారు. చంద్రబాబు విడుదలయ్యే వరకు ఆయనకు మద్దతుగా వివిధ కార్యక్రమాలు నిర్వహించాలని నిర్ణయించారు.