ఉత్తమ పర్యాటక గ్రామంగా ‘లేపాక్షి’

దిల్లీలో పురస్కారం అందుకున్న సర్పంచి

లేపాక్షి, న్యూస్‌టుడే: రాష్ట్రంలోనే ఉత్తమ పర్యాటక గ్రామంగా 2023వ సంవత్సరానికిగాను శ్రీసత్యసాయి జిల్లాలోని ‘లేపాక్షి’ని ప్రకటిస్తూ కేంద్రం ఉత్తర్వులు జారీ చేసింది. ప్రపంచ పర్యాటక దినోత్సవం సందర్భంగా బుధవారం దిల్లీలో నిర్వహించిన కార్యక్రమంలో కేంద్ర పర్యాటకశాఖ ఉన్నతాధికారుల చేతుల మీదుగా సర్పంచి ఆదినారాయణ పురస్కారం అందుకున్నారు. లేపాక్షిలో ప్రజల జీవనశైలి, సంస్కృతి, సంప్రదాయాలు, ఆచార వ్యవహారాలన్నీ గ్రామీణ నేపథ్యంలో సాగుతాయి. ఇప్పటికే యునెస్కో తాత్కాలిక జాబితాలో చోటు దక్కించుకున్న లేపాక్షికి త్వరలోనే శాశ్వత జాబితాలో పేరు దక్కుతుందని సర్పంచి ఆశాభావం వ్యక్తం చేశారు.