జైల్లో చంద్రబాబు సత్యాగ్రహం

సాయంత్రం వరకు ఆహారం తీసుకోకుండా నిరసన

ఈనాడు - రాజమహేంద్రవరం, కాకినాడ: రాజమహేంద్రవరం కేంద్ర కారాగారంలో తెదేపా అధినేత చంద్రబాబు సోమవారం సత్యాగ్రహ దీక్ష చేపట్టారు. ఉదయం 10 నుంచి సాయంత్రం 5 గంటల వరకు ఆయన ఎటువంటి ఆహారం తీసుకోకుండా నిరసన తెలిపారు. జ్యుడిషియల్‌ రిమాండ్‌లో ఉన్న స్నేహబ్లాక్‌లోని గదిలో దీక్ష చేశారు. ఎటువంటి ఆధారాలు లేకుండా తనపై తప్పడు కేసులు నమోదు చేసి, అన్యాయంగా జైల్లో నిర్బంధించి మానసికంగా ఇబ్బందులకు గురి చేస్తున్నారని.. తనకు చట్టంపైనా, న్యాయంపైనా నమ్మకం ఉందని ఇటీవల చంద్రబాబు పేర్కొన్నారు. న్యాయం కోరుతూ జైల్లోనే ఆయన దీక్ష చేశారు.