పిఠాపురంలో ఓట్ల తొలగింపునకు కుట్ర

నియోజకవర్గంలో 862 ఫారం-7ల సమర్పణ

పిఠాపురం, న్యూస్‌టుడే: కాకినాడ జిల్లా పిఠాపురం నియోజకవర్గంలో అర్హులైన పలువురి ఓట్ల తొలగింపునకు కుట్ర జరుగుతోందనే ఫిర్యాదులు అధికారులకు అందుతున్నాయి. ఒక వ్యక్తి 5 ఓట్లకు మించి తొలగింపునకు దరఖాస్తు పెట్టకూడదనే నిబంధన ఉన్నప్పటికీ నియోజకవర్గంలో దాదాపు 12,500 ఓట్ల తొలగింపునకు 862 మంది ఇచ్చిన దరఖాస్తులను బీఎల్‌వోలు స్వీకరించారు. గతంలో పిఠాపురం మున్సిపాలిటీలో బూత్‌ నంబరు 125, డోర్‌ నంబరు 1-2-63లో ఒకే ఇంటి నంబరుపై 448 ఓట్లున్నట్లు అధికారులకు ఫిర్యాదులు అందాయి. దీనిపై విచారణ చేపట్టినా అధికారులు వివరాలు వెల్లడించలేదు. గ్రామాన్ని విడిచి ఇతర ప్రాంతాల్లో పనులు చేసుకుంటున్నవారి ఓట్ల తొలగింపునకు వైకాపా నాయకులు ప్రయత్నిస్తున్నట్లు సమాచారం. ఈ వ్యవహారమంతా సెప్టెంబరు 11 నుంచి 23 మధ్య జరగ్గా 862 మంది ఓట్ల తొలగింపునకు దరఖాస్తులు చేసినట్లు తెలుస్తోంది. ఓటర్ల జాబితా పరిశీలన జరుగుతున్నప్పుడు మాజీ ఎమ్మెల్యే ఎస్‌వీఎస్‌ఎన్‌వర్మ ఈ విషయాన్ని ఓటరు నమోదు అధికారి సుబ్బారావుకు ఫిర్యాదు చేశారు.

వివరాలు ఇవిగో..

• పిఠాపురం మండలం విరవ గ్రామంలోని 102 బూత్‌లో 88 ఓట్ల తొలగింపునకు గాంధీ అనే వ్యక్తి దరఖాస్తు చేశారు.
• కొత్తపల్లి మండలం వాకతిప్ప గ్రామంలోని 213 బూత్‌లో 40 ఓట్లను తీసివేయాలని ఫారం-7ను పి.మంగరాజు సమర్పించారు.
• పిఠాపురం పట్టణంలోని 160వ బూత్‌లో 29 ఓట్ల తొలగింపు కోరుతూ వై.వీరలక్ష్మి ఫిర్యాదు చేశారు.
• గొల్లప్రోలు మండలం చేబ్రోలులోని 37, 40 బూత్‌లతో దేవుడబ్బాయి 37, సుందర్‌ అనేవారు 30 ఓట్ల తొలగింపు కోరుతూ అధికారులకు దరఖాస్తులు అందించారు.

ఎవరూ ఫిర్యాదు చేయలేదు..: ‘ఫారం-7 ద్వారా 5 ఓట్ల కంటే ఎక్కువ తొలగింపునకు దరఖాస్తు చేసినట్లు మాకు ఎవరూ ఫిర్యాదు చేయలేదు. ప్రతి మంగళవారం రాజకీయ పార్టీల నాయకులతో సమావేశాలు నిర్వహించి, వారి అభ్యంతరాలపై చర్చిస్తున్నాం. ఫారం-7ల పరిశీలన ఇంకా పెండింగ్‌లో ఉంది. వాటిని పూర్తిస్థాయిలో పరిశీలిస్తాం’ అని పిఠాపురం ఓటరు నమోదు అధికారి సుబ్బారావు తెలిపారు.