Liquor Scam: మద్యం విధానం ముసుగులో ‘జగన్‌ అండ్‌ కో’ భారీ కుంభకోణం

అధికారం చేపట్టిన వెంటనే దశలవారీ మద్యనిషేధం ముసుగులో మద్యం దుకాణాలన్నింటినీ ప్రభుత్వమే నిర్వహించే విధానాన్ని తీసుకొచ్చిన ‘జగన్‌ అండ్‌ కో’.. దాన్ని అడ్డుపెట్టుకుని అతి పెద్ద కుంభకోణానికి తెరలేపింది.

Updated : 15 Jun 2024 16:17 IST

ప్రధాన లబ్ధిదారు జగనేనని ఫిర్యాదులు
కీలకంగా వ్యవహరించిన మిథున్‌రెడ్డి, విజయసాయిరెడ్డి!
డిస్టిలరీలను చేజిక్కించుకోవటం నుంచి జే బ్రాండ్ల తయారీ వరకూ అంతా మాఫియా తరహా దందా

ఈనాడు- అమరావతి: అధికారం చేపట్టిన వెంటనే దశలవారీ మద్యనిషేధం ముసుగులో మద్యం దుకాణాలన్నింటినీ ప్రభుత్వమే నిర్వహించే విధానాన్ని తీసుకొచ్చిన ‘జగన్‌ అండ్‌ కో’.. దాన్ని అడ్డుపెట్టుకుని అతి పెద్ద కుంభకోణానికి తెరలేపింది. మద్యం తయారీ, కొనుగోలు, సరఫరా, విక్రయాలన్నింటినీ గుప్పిట పెట్టుకుని ఐదేళ్లలో భారీగా దోచుకుంది. రూ.వేల కోట్ల విలువైన ఈ కుంభకోణంలో ప్రధాన లబ్ధిదారు జగన్‌మోహన్‌రెడ్డి కాగా.. వైకాపా ఎంపీలు పెద్దిరెడ్డి మిథున్‌రెడ్డి, విజయసాయిరెడ్డిలు కీలకంగా వ్యవహరించారన్న ఫిర్యాదులున్నాయి. వీరి బినామీలనే పేరున్న కంపెనీలకే ఐదేళ్లలో దాదాపు రూ.10 వేల కోట్ల విలువైన మద్యం సరఫరా ఆర్డర్లు దక్కడం వీటికి బలం చేకూరుస్తోంది. సకల శాఖల మంత్రిగా పేరొందిన వ్యక్తి, సీఎంఓలో అన్నీ తానై వ్యవహరించిన ఓ అధికారికి దీనిలో భాగస్వామ్యం ఉందనే చర్చ ఎక్సైజ్‌ వర్గాల్లో జరుగుతోంది. ఈ కుంభకోణం సూత్రధారి, అంతిమ లబ్ధిదారు, అందులో క్రియాశీలకంగా వ్యవహరించిన నాయకులు, వారి మూలాలు పూర్తిగా బయటకు తీసేందుకు సీబీఐ, ఎన్‌ఫోర్స్‌మెంట్‌ డైరెక్టరేట్‌ (ఈడీ)తో సమగ్ర దర్యాప్తు చేయించాలన్న డిమాండ్లు పెరుగుతున్నాయి. 

డిస్టిలరీలను చేజిక్కించుకుని... ‘జే’ బ్రాండ్లను జనంపైకి వదిలి

కొత్త మద్యం విధానం తీసుకొచ్చిన వెంటనే ప్రభుత్వ పెద్దలు, వైకాపా నాయకులు తొలుత సన్నిహితులతో బినామీల పేరిట మద్యం సరఫరా కంపెనీలు ఏర్పాటు చేశారు. ఆ తర్వాత రాష్ట్రంలో ఇతరుల యాజమాన్యంలో ఉన్న డిస్టిలరీలు, బ్రూవరీస్‌ను సామదానభేద దండోపాయాలు ప్రయోగించి చేజిక్కించుకున్నారు. అక్కడే ఊరూపేరూ లేని ‘జే బ్రాండ్లు’ తయారు చేయించి జనంపైకి వదిలారు. వీటితో పాటు ఒక్కో కేసుకు తాము అడిగినంత కమీషన్‌ చెల్లించేందుకు అంగీకరించిన కంపెనీలకు మాత్రమే మద్యం సరఫరా ఆర్డర్లు ఇచ్చారు. అంతకు ముందున్నవి, గతంలో ప్రాచుర్యం పొందిన బ్రాండ్లేవీ లేకుండా, కేవలం ‘జే బ్రాండ్లే’ అమ్మారు. డిజిటల్‌ చెల్లింపులకు ఆస్కారం లేకుండా నగదు తీసుకుని మద్యం అమ్మారు. ఆది నుంచి అంతం వరకూ మద్యం వ్యాపారం మొత్తాన్ని మాఫియా తరహాలో గుప్పిట్లో పెట్టుకుని దోచుకున్నారు. 

మొత్తం మిథున్‌రెడ్డి కనుసన్నల్లోనే!

వైకాపా ప్రభుత్వంలోనూ, పార్టీలోనూ నంబర్‌-2గా చలామణి అయిన పెద్దిరెడ్డి రామచంద్రారెడ్డి కుమారుడు, వైకాపా ఎంపీ పెద్దిరెడ్డి మిథున్‌రెడ్డి.. కనుసన్నల్లోనే మద్యం కుంభకోణమంతా జరిగిందన్న ఫిర్యాదులున్నాయి. మద్యం సరఫరా కంపెనీలతో సంప్రదింపులు జరపటం, అడిగినంత కమీషన్‌ చెల్లించేందుకు అంగీకరించిన వారికే సరఫరా ఆర్డర్లు ఇచ్చేలా చూడటం, వారి నుంచి వసూలు చేసిన కమీషన్ల సొమ్మును ‘బిగ్‌బాస్‌’కు చేర్చటంలో ఈయనదే ప్రధాన పాత్ర అని ఎక్సైజ్‌ వర్గాల్లో చర్చ జరుగుతోంది. ఐటీ సలహాదారుగా పనిచేసిన కసిరెడ్డి రాజశేఖర్‌రెడ్డిని తెర ముందు పెట్టుకుని మొత్తం అక్రమ వ్యవహారాలు నడిపించారన్న విమర్శలున్నాయి. ఎన్నికల ఫలితాలు వెలువడిన రోజున.. ఈ కుంభకోణంలో పాత్రధారులైన అధికారులందరితో టెలికాన్ఫరెన్స్‌ నిర్వహించి ఆధారాలన్నీ ధ్వంసం చేయాలని ఆదేశించినట్లు ఎక్సైజ్‌ శాఖలో ప్రచారం జరుగుతోంది. 

ఎస్పీవైను గుప్పిట్లో పెట్టుకుని.. రూ.6 వేల కోట్ల మద్యం దందా

అధికారం చేపట్టిన వెంటనే రాష్ట్రంలో అతి పెద్ద డిస్టిలరీల్లో ఒకటైన నంద్యాలలోని ఎస్పీవై ఆగ్రో ఇండస్ట్రీస్‌ను మిథున్‌రెడ్డి అనధికారికంగా తన గుప్పిట్లోకి తెచ్చుకున్నారు. కృష్ణా జిల్లాలోని సెంటినీ బయోప్రొడక్ట్స్‌ డిస్టిలరీలోనూ పాగా వేశారు. ఇక్కడ పెద్ద ఎత్తున ‘జే బ్రాండ్లు’ తయారు చేయించారు. ఏపీఎస్‌బీసీఎల్‌ 2019 అక్టోబరు 2 నుంచి 2021 నవంబరు మధ్య కేవలం 25 నెలల వ్యవధిలో ఏకంగా రూ.1,863 కోట్ల విలువైన 1.16 కోట్ల కేసుల మద్యం సరఫరా ఆర్డర్లను ఎస్పీవై ఆగ్రో ఇండస్ట్రీస్‌ కంపెనీకి కట్టబెట్టింది. గత ఐదేళ్లలో ఈ కంపెనీకి ఇచ్చిన మద్యం సరఫరా ఆర్డర్ల విలువ రూ.6 వేల కోట్లపైనే ఉంటుందనేది అనధికారిక అంచనా. మద్యం తయారు చేసేది, దాన్ని ఏపీఎస్‌బీసీఎల్‌తో కొనుగోలు చేయించింది రెండూ మిథున్‌రెడ్డేనని ఫిర్యాదులున్నాయి. 

అల్లుడి బినామీ పేరుతో కంపెనీ పెట్టి విజయసాయిరెడ్డి దందా  

వైకాపా ఎంపీ విజయసాయిరెడ్డి.. గత ప్రభుత్వం నూతన విధానం తీసుకొచ్చిన రెండు నెలలకే తన అల్లుడైన పెనక రోహిత్‌రెడ్డికి సంబంధించిన బినామీ పేరుతో మద్యం సరఫరా కంపెనీ పెట్టించి భారీగా దోచుకున్నారన్న ఫిర్యాదులున్నాయి. 2019 డిసెంబరు 2న ‘అదాన్‌ డిస్టిలరీస్‌ ప్రైవేట్‌ లిమిటెడ్‌’ సంస్థ హైదరాబాద్‌లో పురుడు పోసుకుంది. ఈ సంస్థకు సొంతంగా ఒక్క డిస్టిలరీ కూడా లేదు. విశాఖ డిస్టిలరీస్‌ ప్రైవేట్‌ లిమిటెడ్, పీఎంకే డిస్టిలేషన్‌ ప్రైవేట్‌ లిమిటెడ్, ఎస్పీవై ఆగ్రో ఇండస్ట్రీస్‌ను సబ్‌లీజు పేరిట అనధికారికంగా ఆధీనంలోకి తీసుకుని ‘జే బ్రాండ్లు’ తయారు చేసి జనంపైకి వదిలారు. కొత్తగా ఏర్పాటైన ఈ కంపెనీకి కేవలం 25 నెలల వ్యవధిలో రూ.1,164.86 కోట్ల విలువైన మద్యం సరఫరా ఆర్డర్లు దక్కాయి. గత నాలుగున్నరేళ్లలో రూ.4 వేల కోట్ల విలువైన సరఫరా ఆర్డర్లు లభించినట్లు అనధికారిక లెక్క. 

ఏ బ్రాండ్లు అమ్మాలో చెప్పేది కసిరెడ్డి రాజశేఖర్‌రెడ్డే.. 

కాశీచయనుల శ్రీనివాస్, ముప్పిడి అనిరుధ్‌రెడ్డిలు డైరెక్టర్లుగా అదాన్‌ డిస్టిలరీస్‌ ప్రైవేట్‌ లిమిటెడ్‌ ఏర్పాటైంది. వైకాపా ఎంపీ విజయసాయిరెడ్డి అల్లుడు పెనక రోహిత్‌రెడ్డి డైరెక్టర్‌గా కొనసాగిన శ్రేయాస్‌ బయోలాజికల్‌ ప్రైవేట్‌ లిమిటెడ్‌లో కాశీచయనుల శ్రీనివాస్‌ కొన్నాళ్ల పాటు డైరెక్టర్‌గా ఉన్నారు. ముప్పిడి అనిరుధ్‌రెడ్డి..  జగన్‌మోహన్‌రెడ్డికి అత్యంత సన్నిహితుడైన, మద్యం కుంభకోణంలో అన్నీ తానై వ్యవహరించారనే అభియోగాలు ఎదుర్కొంటున్న కసిరెడ్డి రాజశేఖర్‌రెడ్డికి తోడల్లుడు. ఏ కంపెనీ నుంచి ఎంత మద్యం కొనాలి? ఏ రోజు ఏ బ్రాండ్ల మద్యం అమ్మాలన్నది రాజశేఖర్‌రెడ్డి ఆదేశాల మేరకే జరిగింది. అదాన్‌ కంపెనీ సరఫరా చేసిన అదాన్స్‌ సుప్రీమ్‌ బ్లెండ్‌ సుపీరియర్‌ గ్రెయిన్‌ విస్కీ, 9 సీహార్సెస్‌ విస్కీ, ఏసీ బ్లాక్‌ రిజర్వు విస్కీ వంటి బ్రాండ్లను మాత్రమే కొన్నాళ్లపాటు దుకాణాల్లో అమ్మించారు. 

ఈ మద్యం కుంభకోణం మూలాలు తాడేపల్లి ప్యాలెస్‌ నుంచి అనేక చోట్లకు వ్యాపించాయి.కేంద్ర దర్యాప్తు సంస్థలు రంగంలోకి దిగాలనే అభిప్రాయాలు వినిపిస్తున్నాయి.


దిల్లీ మద్యం కుంభకోణం కీలకపాత్రధారి శరత్‌చంద్రారెడ్డి సంస్థతో లింకులు

దిల్లీ మద్యం కుంభకోణం అభియోగాలు ఎదుర్కొంటున్న ట్రైడెంట్‌ కెమ్‌ఫర్‌ ప్రైవేట్‌ లిమిటెడ్‌కు, ఏపీలోని అదాన్‌ డిస్టిలరీస్‌ ప్రైవేట్‌ లిమిటెడ్‌ మధ్య విడదీయరాని అనుబంధముంది. దిల్లీ మద్యం కుంభకోణంలో విజయసాయిరెడ్డి అల్లుడి సోదరుడైన పెనక శరత్‌చంద్రారెడ్డిని ఈడీ ఏడాదిన్నర కిందట అరెస్టు చేసింది. ఈ కుంభకోణంలో ఆయన చక్రం తిప్పారని.. దిల్లీ మద్యం వ్యాపారంలో 30 శాతం ఆయన గుప్పిట్లోనే ఉందని ఈడీ వెల్లడించింది. ట్రైడెంట్‌ కెమ్‌ఫర్‌ ప్రైవేట్‌ లిమిటెడ్‌తో పాటు మరికొన్ని బినామీ సంస్థల ద్వారా ఈ వ్యవహారాలు నడిపించారని పేర్కొంది. అదాన్‌ డిస్టిలరీస్‌ వ్యవస్థాపక డైరెక్టర్లలో ఒకరైన కాశీచయనుల శ్రీనివాస్‌ ఈ ట్రైడెంట్‌ కెమ్‌ఫర్‌ ప్రైవేట్‌ లిమిటెడ్‌లోనే గతంలో సీఎఫ్‌ఓగా పనిచేశారు. 

  • ట్రైడెంట్‌ కెమ్‌ఫర్‌ ప్రైవేట్‌ లిమిటెడ్‌ సంస్థలో 99.99 శాతం వాటాలు ఆర్‌పీఆర్‌ సన్స్‌ అడ్వయిజర్స్‌ ప్రైవేట్‌ లిమిటెడ్‌ పేరిట ఉన్నాయి. ఆర్‌పీఆర్‌ సన్స్‌ కంపెనీలో విజయసాయిరెడ్డి అల్లుడు పెనక రోహిత్‌రెడ్డి 2021 ఏప్రిల్‌ 21న డైరెక్టర్‌గా చేరారు. ఆయనతో పాటు పెనక వెంకట రామ్‌ప్రసాద్‌రెడ్డి, పి.సుశీలరాణి డైరెక్టర్లుగా ఉన్నారు. 
  • పెనక రోహిత్‌రెడ్డి డైరెక్టర్‌గా ఉన్న శ్రేయాస్‌ బయోలాజికల్‌ ప్రైవేట్‌ లిమిటెడ్‌ కంపెనీలో కాశీచయనుల శ్రీనివాసులు 2021 జూన్‌ 19 వరకూ డైరెక్టర్‌గా కొనసాగారు. అప్పుడే ఆయన అదాన్‌ డిస్టిలరీని స్థాపించారు. 
  • శ్రేయాస్‌ బయోలాజికల్‌ ప్రైవేట్‌ లిమిటెడ్‌ రిజిస్టర్డ్‌ చిరునామా, దిల్లీ మద్యం కుంభకోణంలో ఆరోపణలు ఎదుర్కొంటున్న ట్రైడెంట్‌ కెమ్‌ఫర్‌ ప్రైవేట్‌ లిమిటెడ్‌ రిజిస్టర్‌ చిరునామాలు ఒకటే. హైదరాబాద్‌లోని మియాపూర్‌ సర్వే నంబర్‌ 66, 67 చిరునామాలతో ఈ రెండు కంపెనీలు రిజిస్టరై ఉన్నాయి. 
  • ట్రైడెంట్‌ కెమ్‌ఫర్‌ ప్రైవేట్‌ లిమిటెడ్‌లో పెనక శరత్‌ చంద్రారెడ్డి 2007 ఫిబ్రవరి 21 నుంచి 2016 మే 27 వరకు డైరెక్టర్‌గా ఉన్నారు. ఆయన సోదరుడు, ఎంపీ విజయసాయిరెడ్డి అల్లుడు పెనక రోహిత్‌రెడ్డి 2010 జనవరి 27 నుంచి 2018 మార్చి 9 వరకు డైరెక్టర్‌గా కొనసాగారు. ఇప్పుడు వారిద్దరూ సాంకేతికంగా ఆ కంపెనీలో డైరెక్టర్లుగా లేకపోయినప్పటికీ... దిల్లీ మద్యం కుంభకోణంపై దాఖలు చేసిన కస్టడీ రిపోర్టులో ట్రైడెంట్‌ సంస్థ శరత్‌చంద్రారెడ్డికి చెందిన గ్రూప్‌ కంపెనీ అంటూ గతంలో ఈడీ పేర్కొంది.
  • ఏపీలో చోటుచేసుకున్న కుంభకోణం మూలాలు అటు దిల్లీ వరకూ విస్తరించి ఉన్నాయి.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ap-districts
ts-districts

సుఖీభవ

చదువు