Punganur: ఒక్క ఉత్తర్వుతో.. 982 ఎకరాలు కొట్టేశారు

ఒకటీ రెండూ కాదు.. చిత్తూరు జిల్లా పుంగనూరు మండలం రాగానిపల్లిలో ఏకంగా 982 ఎకరాల భూములు.. మొత్తంగా వాటి విలువ రూ.100 కోట్లకు పైనే. రెవెన్యూ దస్త్రాల్లో అనాధీనం (ప్రభుత్వ భూములు) పేరుతో నమోదైన ఆ భూముల్ని..

Updated : 09 Jul 2024 07:03 IST

చిత్తూరు ‘పెద్దారెడ్డి’ లీల 
అనాధీనం కాస్తా పట్టా భూములయ్యాయి 
వెంటనే నిషేధిత జాబితా నుంచి తొలగింపు 
నాటి చిత్తూరు జేసీ, నేటి తిరుపతి కలెక్టర్‌ వెంకటేశ్‌ ఘనకార్యం 
దశాబ్దాలుగా వివాదంలో ఉన్న భూములపై నిర్ణయం  
అధిక శాతం ‘పెద్దాయన’ అనుచరుల చేతుల్లోకే 
ప్రభుత్వం మారినా వైకాపా విధేయులుగానే అధికారులు 
ఈనాడు - అమరావతి 

కటీ రెండూ కాదు.. చిత్తూరు జిల్లా పుంగనూరు మండలం రాగానిపల్లిలో ఏకంగా 982 ఎకరాల భూములు.. మొత్తంగా వాటి విలువ రూ.100 కోట్లకు పైనే. రెవెన్యూ దస్త్రాల్లో అనాధీనం (ప్రభుత్వ భూములు) పేరుతో నమోదైన ఆ భూముల్ని.. గతంలో పనిచేసిన కలెక్టర్లు, సంయుక్త కలెక్టర్లు కాపాడుతూనే వచ్చారు. కానీ వైకాపా ప్రభుత్వంలో పనిచేసిన అధికారులు మాత్రం ‘పెద్దాయన’ అండ చూసుకుని రెచ్చిపోయారు. మనల్ని అడిగేదెవరులే అని మొత్తం భూముల్ని పట్టా భూములుగా తేల్చేయడం ద్వారా.. 600 ఎకరాలకు పైగా భూముల్ని పెద్దాయన అనుచరుల చేతుల్లోకి వెళ్లిపోయేలా చేశారు. గత ప్రభుత్వంలో చిత్తూరు జిల్లా సంయుక్త కలెక్టర్‌గా పనిచేసి.. ఇటీవల తిరుపతి జిల్లా కలెక్టర్‌గా నియమితులైన ఎస్‌ వెంకటేశ్‌ ఒక్క ఆర్డర్‌తో దశాబ్దాలుగా వివాదాస్పదంగా ఉన్న 982 ఎకరాల భూమిని ఇలా ప్రైవేటు వ్యక్తుల పరం చేశారు. ఆ తర్వాత నిషేధిత జాబితా (22ఏ) నుంచి అధికారులు తొలగించారు. ఈ వ్యవహారంలో మరో ఇద్దరు కలెక్టర్లూ పనిచేశారు. పట్టా భూముల కోసం రెవెన్యూ స్థాయిలో ఒత్తిడి తెచ్చిందీ, 22ఏ నిషేధిత జాబితా నుంచి తొలగించిందీ వారే. ఈలోగా ప్రభుత్వం మారింది. గత ప్రభుత్వంలో పెద్దాయన విధేయులుగా అక్కడే విధులు నిర్వహిస్తున్న కొందరు అధికారులు.. మొత్తం భూముల్ని ఇటీవలే వెబ్‌ల్యాండ్‌లో నమోదు చేసేశారు. ఇవన్నీ చూసి ఏ ప్రభుత్వం ఉన్నా పెత్తనం మాత్రం వైకాపా వీర విధేయ అధికారులదే అని తెలుగుదేశం, జనసేన వర్గాలు మండిపడుతున్నాయి.

పుంగనూరు జమిందారు పట్టా నుంచి మొదలు

రాగానిపల్లిలోని 982.49 ఎకరాల భూమికి 1907లో అప్పటి పుంగనూరు జమిందారు.. మహదేవరాయలు పేరుతో పట్టా ఇచ్చారు. 1948 ఎస్టేట్‌ ఎబాలిషన్‌ చట్టం ప్రకారం ఈ భూమిని ప్రభుత్వం పుంగనూరు జమిన్‌ ఎస్టేట్‌లో భాగమని ప్రకటించి, స్వాధీనం చేసుకుంది. అనంతరం సెటిల్‌మెంట్‌ అధికారులు దీనిపై సుమోటో విచారణ చేసి, ఈ భూమికి మహదేవరాయలు కుమారుడు శంకరరాయలు పేరుతో 1958 ఫిబ్రవరి 27న రఫ్‌ పట్టా (చిత్తు పట్టా) ఇచ్చారు. తర్వాత ఆయన దీన్ని వెంకటస్వామి, రెడ్డెప్పరెడ్డికి విక్రయించారు. రైత్వారీ పట్టాలు వచ్చాయి. తర్వాత ఈ భూమి పలుమార్లు చేతులు మారింది. రిజిస్ట్రేషన్లు కూడా జరిగాయి. 1973 డిసెంబరులో సెటిల్‌మెంట్‌ డైరెక్టర్‌ ఈ భూమి అనుభవదారులకు నోటీసులిచ్చారు. జమిందారు పట్టా జారీ నిబంధనలకు విరుద్ధమని, అది సాగు భూమి కాదని, అడవిగా ఉందని పేర్కొన్నారు. సాగుభూమిగా మార్చడానికి 1908 నాటి ఎస్టేట్స్‌ ల్యాండ్‌ చట్టం ప్రకారం.. అప్పటి కలెక్టర్‌ అనుమతి ఇవ్వలేదని పేర్కొన్నారు. 1977 ఫిబ్రవరి 24న శంకరరాయలుకు ఇచ్చిన పట్టాను రద్దు చేశారు. 

ఏకపక్షంగా ఉత్తర్వులిచ్చిన సంయుక్త కలెక్టర్‌

అనంతరం వెంకటస్వామి, రెడ్డెప్పరెడ్డి వారసులు ఈ భూమిపై హక్కుల కోసం కోర్టుల్లో పిటిషన్లు, అప్పీళ్లు వేశారు. చివరగా దీనిపై 2022లో చిత్తూరు సంయుక్త కలెక్టర్‌ వెంకటేశ్‌ విచారణ చేపట్టారు. 1907లో రఫ్‌పట్టాను ధ్రువీకరించారని, దీన్ని మళ్లీ విచారించి పట్టా ఇవ్వక్కర్లేదని పేర్కొన్నారు. 1908 ఎస్టేట్స్‌ ల్యాండ్‌ చట్టానికి ముందే పుంగనూరు జమిందారు పట్టా ఇచ్చారని.. ఆ అధికారం ఆయనకు ఉందని చెప్పారు. దీనిపై అనేక లావాదేవీలు జరగడం ద్వారా.. పట్టాభూమిగా గుర్తించారని జేసీ తేల్చారు. ఇవి వ్యవసాయ భూములే అని.. యూకలిప్టస్, మామిడి, కానుగ, నేరేడు తదితర తోటలు పెంచుతున్నారని, అధికారులు శిస్తు వసూలు చేశారని, విద్యుత్తు కనెక్షన్‌ ఇచ్చారని వివరించారు. 

చిత్తు పట్టాపై హక్కు రాదని తెలియదా?

1907లో రఫ్‌ పట్టా ఇచ్చినా.. వారు 1948 ఎస్టేట్‌ ఎబాలిషన్‌ చట్టం ప్రకారం 1945 జులై 1 నాటికి భూమి మీద తామే ఉన్నామని సెటిల్‌మెంట్‌ ఆఫ్‌ ఆపరేషన్స్‌ వద్ద శాశ్వత పట్టా తీసుకోవాలి. అలా తీసుకోలేదు. ఒకరి పేరుతో 982 ఎకరాల భూమి ఉంటే.. అది 1976 ల్యాండ్‌ సీలింగ్‌ చట్టం పరిధిలోకి వస్తుంది. కానీ ఈ భూమి రాలేదు. రఫ్‌ పట్టా చెల్లదని గతంలో న్యాయస్థానాలు కూడా తీర్పు ఇచ్చాయి. అయినా అప్పటి జేసీ వెంకటేశ్‌ రఫ్‌ పట్టా చెల్లుతుందని, కొత్త పట్టా అవసరం లేదని తేల్చేశారు. దీనికి అనుగుణంగా కలెక్టర్‌ నిషేధిత జాబితా (22ఎ) నుంచి వాటిని తొలగించారు.  

కొత్త ప్రభుత్వంలోనూ తగ్గకుండా.. పెద్దాయన అనుచరులకు పందేరం

అయితే కొత్త ప్రభుత్వం ఏర్పడిన తర్వాతా వైకాపా విధేయ అధికారులు వెనక్కి తగ్గలేదు. పెద్దాయనకు అనుకూలంగా వెబ్‌ల్యాండ్‌లో మార్పులు చేయడం గమనార్హం. 22వ సర్వే నంబరు విస్తీర్ణం 982.49 ఎకరాలు కాగా వెబ్‌ల్యాండ్‌లో అనాధీనం అని చూపిస్తోంది. అదే సర్వే నంబరులో సబ్‌డివిజన్‌ కింద పలువురి పేర్లతో ఆన్‌లైన్‌ చేశారు. అంటే సర్వే నంబరు మొత్తం విస్తీర్ణానికి మించి రెట్టింపు నమోదైంది. అధికారులెంత అడ్డగోలుగా పనిచేశారో చెప్పడానికి ఇదే నిదర్శనం. వెబ్‌ల్యాండ్‌లో పేర్లు నమోదు చేసిన వారిలో.. పూర్వీకుల నుంచి హక్కుకోసం పోరాడుతున్న వారి వారసులు ఏడుగురు మాత్రమే అని.. మిగిలిన వారంతా పెద్దాయన అనుచరులేనని, వారికే సుమారు 600 ఎకరాల వరకు కట్టబెట్టారని స్థానికులు చెబుతున్నారు. దీనిపై సమగ్ర విచారణ చేయిస్తే.. ఈ భూ దందాలో అప్పటి ఐఏఎస్‌ అధికారులతోపాటు రెవెన్యూలోని వివిధస్థాయి అధికారుల పాత్ర వెలుగులోకి వస్తుంది.

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని