మౌలిక ప్రాజెక్టులపై రూ.4.34 లక్షల కోట్ల భారం

దిల్లీ: రూ.150 కోట్లు, అంత కంటే ఎక్కువ వ్యయంతో చేపట్టిన 442 మౌలిక ప్రాజెక్టుల నిర్మాణం ఆలస్యం కావడంతో, అదనంగా రూ.4.34 లక్షల కోట్ల భారం పడుతోందని గణాంక, పథకాల అమలు మంత్రిత్వ శాఖ నివేదిక వెల్లడించింది. మొత్తం 1,671 మౌలిక ప్రాజెక్టుల్లో 536 ప్రాజెక్టులు ఆలస్యమవుతున్నాయని తెలిపింది. 1,671 ప్రాజెక్టులకు తొలుత అంచనా వేసిన వ్యయం రూ.21,21,383.82 కోట్లు కాగా, ఇప్పుడు అది రూ.25,55,957.52 కోట్లకు పెరిగిందని (20.49 శాతం మేర) మంత్రిత్వ శాఖ 2020 నవంబరు నివేదికలో వెల్లడించింది. గత నెలాఖరుకు ఈ ప్రాజెక్టులపై రూ.11,93,997.81 కోట్ల మేర (46.71 శాతం) ప్రభుత్వం వ్యయం చేసిందని పేర్కొంది. 536 ప్రాజెక్టుల్లో 120 ప్రాజెక్టులు 1-12 నెలలు, 134 ప్రాజెక్టులు 13-24 నెలలు, 162 ప్రాజెక్టులు 25-60 నెలలు, 120 ప్రాజెక్టులు 61 నెలలకు పైగా ఆలస్యమవుతాయని వివరించింది.