GST: క్యాసినోలు, ఆన్‌లైన్‌ గేమింగ్‌పై 28% జీఎస్‌టీ!

దిల్లీ: క్యాసినోలు, ఆన్‌లైన్‌ గేమింగ్‌, గుర్రపు పందేలపై 28 శాతం జీఎస్‌టీ విధించాలన్న ప్రతిపాదనపై ఈనెల 28-29 తేదీల్లో జరగబోయే జీఎస్‌టీ మండలి సమావేశం చర్చించే అవకాశం ఉంది. ఆన్‌లైన్‌ గేమింగ్‌లో పాల్గొనే ఆటగాడు చెల్లించే ప్రవేశ రుసుం సహా పూర్తి విలువపై జీఎస్‌టీ విధించాలని మేఘాలయ ముఖ్యమంత్రి కాన్రాడ్‌ సంగ్మా నేతృత్వంలోని మంత్రుల బృందం సిఫారసు చేసింది. గుర్రపు పందేల విషయానికొస్తే.. బుక్‌మేకర్లతో వేసే బెట్‌ల పూర్తి విలువపై జీఎస్‌టీ విధించాలని మంత్రుల బృందం సూచించింది. క్యాసినోలో ఆటగాడు కొనుగోలు చేసే చిప్స్‌/కాయిన్‌ పూర్తి ముఖవిలువపై పన్ను వసూలు చేయాలని కోరింది.