Airtel: ఎయిర్‌టెల్‌ అదనపు డేటా కూపన్ల ఉపసంహరణ.. ఎందుకంటే

దిల్లీ: ఇటీవల వివిధ ప్రీపెయిడ్‌ పథకాల టారిఫ్‌లను పెంచిన టెలికాం దిగ్గజం భారతీ ఎయిర్‌టెల్‌ మరో కీలక నిర్ణయం తీసుకుంది. యాప్‌ ద్వారా పలు ప్రీపెయిడ్‌ ప్లాన్లపై అందిస్తున్న అదనపు డేటా కూపన్లను ఉపసంహరించుకున్నట్లు తెలిపింది. వీటి వల్ల వివిధ ప్లాన్ల ఆఫర్లను పోల్చుకోవడంలో వినియోగదారుల్లో గందరగోళం తలెత్తుతోందని తెలిపింది. దీన్ని నివారించడానికే కూపన్లను ఉపసంహరించుకుంటున్నట్లు పేర్కొంది. 

వాయిస్‌ పథకాలు, అపరిమిత ప్లాన్‌లు, డేటా టాప్‌ అప్స్‌ వంటి పథకాల ధరలను 20-25 శాతం పెంచుతూ ఇటీవలే ఎయిర్‌టెల్‌ ప్రకటన చేసింది. ఈ పెంచిన ఛార్జీలు ఈనెల 26 నుంచి అమల్లోకి వచ్చాయి. ప్రారంభ స్థాయి ప్లాన్‌ల ధర దాదాపు 25 శాతం పెరగ్గా, అపరిమిత పథకాల ధరలు దాదాపు 20 శాతం పెరిగాయి. డేటా టాప్‌అప్‌ పథకాల ధరలను 20-21 శాతం మేర కంపెనీ పెంచింది. కంపెనీ ఆర్థికంగా స్థిరంగా ఉండాలంటే వినియోగదారుపై సగటు ఆదాయం (ఆర్పు) నెలకు రూ.200కు చేరాలని, తదుపరి రూ.300 కావాల్సిన అవసరం ఉందని ఎయిర్‌టెల్‌ పేర్కొంది. నెట్‌వర్క్‌ - స్పెక్ట్రమ్‌ కోసం పెట్టుబడులకు, దేశంలో 5జీ సేవల ప్రారంభానికి ఇది అవసరమని వివరించింది.