మౌలిక ప్రాజెక్టులపై రూ.4.28 లక్షల కోట్ల అదనపు భారం

దిల్లీ: రూ.150 కోట్లు అంత కంటే ఎక్కువ వ్యయంతో నిర్మితమవుతున్న 450 మౌలిక ప్రాజెక్టుల పనులు ఆలస్యం కావడంతో, వాటిపై రూ.4.28 లక్షల కోట్ల అదనపు భారం పడుతోందని గణాంకాలు, పథకాల అమలు మంత్రిత్వ శాఖ నివేదిక వెల్లడించింది. మొత్తం 1,687 ప్రాజెక్టుల్లో 450 నిర్మాణాలపై అదనపు భారం పడుతుండగా, 558 మాత్రం ఆలస్యమవుతున్నాయని పేర్కొంది. ‘తొలుత మొత్తం ప్రాజెక్టుల నిర్మాణ వ్యయం రూ.21,44,627.66 కోట్లుగా అంచనా వేయగా, తాజాగా అది రూ.25,72,670.28 కోట్లకు చేరింది. అంటే రూ.4,28,042.62 కోట్లు (19.96 శాతం అధికం) అదనంగా పెరుగుతోంద’ని మంత్రిత్వ శాఖ వెల్లడించింది. 2020 డిసెంబరు నాటికి ఈ ప్రాజెక్టులపై రూ.12,17,692.37 కోట్లు (47.33 శాతం) వ్యయం చేసినట్లు తెలిపింది.