హోమ్‌ లోన్‌ @ 6.40%.. వడ్డీ రేట్లు తగ్గించిన బ్యాంక్‌ ఆఫ్‌ మహారాష్ట్ర

దిల్లీ: ప్రభుత్వ రంగానికి చెందిన బ్యాంక్‌ ఆఫ్‌ మహారాష్ట్ర (బీఓఎం) గృహ రుణాలపై వడ్డీ రేట్లను తగ్గించింది. 6.40 శాతానికే హోమ్‌ లోన్‌ ఇస్తున్నట్లు ప్రకటించింది. గతంలో 6.80 శాతంగా ఉన్న వడ్డీ రేటును సవరిస్తున్నట్లు ఓ ప్రకటన విడుదల చేసింది. రిటైల్‌ బొనాంజా ఫెస్టివ్‌ ధమాకా పేరిట ఈ ఆఫర్‌ను ప్రకటించింది. డిసెంబర్‌ 13 నుంచి తగ్గించిన వడ్డీ రేట్లు వర్తిస్తాయని పేర్కొంది.

కారు లోన్‌పై సైతం వడ్డీరేట్లను బ్యాంక్‌ ఆఫ్‌ మహారాష్ట్ర తగ్గించింది. గతంలో 7.05 శాతం ఉండగా మార్కెట్‌ పోటీని దృష్టిలో ఉంచుకుని 6.80 శాతానికి తగ్గించినట్లు పేర్కొంది. క్రెడిట్‌ స్కోరు ఆధారంగా వడ్డీ రేటు వర్తిస్తుందని తెలిపింది. బంగారు, గృహ, కారు లోన్‌పై ప్రాసెసింగ్‌ ఫీజును రద్దు చేసినట్లు పేర్కొంది. ఫెస్టివ్‌ బొనాంజాను వినియోగించుకోవడం ద్వారా వినియోగదారులు రుణాలపై పెద్ద మొత్తంలో ఆదా చేసుకోగలుగుతారని బ్యాంక్‌ ఆఫ్‌ మహారాష్ట్ర ఎగ్జిక్యూటివ్‌ డైరెక్టర్‌ హేమంత్‌ తామ్టా అభిప్రాయపడ్డారు.