ఆర్థిక కార్యదర్శితో కెయిర్న్‌ సీఈఓ భేటీ

దిల్లీ: రెట్రోస్పెక్టివ్‌ (పాత తేదీల నుంచి విధించే) పన్ను కేసులో భారత ప్రభుత్వంపై అంతర్జాతీయ మధ్యవర్తిత్వ కోర్టులో విజయం సాధించిన రెండు నెలల తర్వాత, గురువారం ఆర్థిక కార్యదర్శి అజయ్‌ భూషణ్‌ పాండే, ఇతర ముఖ్య అధికారులతో కెయిర్న్‌ ఎనర్జీ పీఎల్‌సీ చీఫ్‌ ఎగ్జిక్యూటివ్‌ సైమన్‌ ధామ్సన్‌ భేటీ అయ్యారు. సీబీడీటీ ఛైర్మన్‌ పీసీ మోదీ, ఇతర పన్ను అధికారులతో సైతం సైమన్‌ సమావేశమయ్యారు. పన్ను వివాదం త్వరలోనే పరిష్కారం అవుతుందని ఆయన ఆశాభావం వ్యక్తం చేశారు. సమావేశంపై ఇంతకు మించి మాట్లాడలేనని అన్నారు. కెయిర్న్‌కు అనుకూలం వచ్చిన తీర్పుపై అంతర్జాతీయ కోర్టులో భారత్‌ అప్పీలు చేసుకునే అవకాశం ఉందని భారత వర్గాలు సంకేతాలిచ్చిన నేపథ్యంలో ఈ భేటీ ప్రాధాన్యత సంతరించుకుంది. భారత్‌ నుంచి 1.4 బిలియన్‌ డాలర్ల పరిహారం కోసం కెయిర్న్‌ వాటాదార్లు కంపెనీ మేనేజ్‌మెంట్‌పై ఒత్తిడి తీసుకొస్తున్నారు. ఈ వివాదంపై పరిష్కారం కోసం ఆర్థిక మంత్రి నిర్మలా సీతారామన్‌తో భేటీ కావాలని ధామ్సన్‌ కోరుతూ వస్తున్నారు.