Evergrande: డబ్బులు లేవు.. చేతులెత్తేసిన ఎవర్‌గ్రాండ్‌..! 

రెండో గడువు ముగిసినా చెల్లింపులు చేయని రియాల్టీ దిగ్గజం

ఇంటర్నెట్‌డెస్క్‌: చైనా రియల్‌ ఎస్టేట్‌ దిగ్గజం ఎవర్‌గ్రాండ్‌ విదేశీ పెట్టుబడిదారులకు వడ్డీ చెల్లించలేకపోయింది. ఈ విధంగా జరగడం వారం రోజుల వ్యవధిలో ఇది రెండోసారి. ఈ సంస్థ బుధవారం నాటికి విదేశీ పెట్టుబడిదారులకు 47.5 మిలియన్‌ డాలర్లు చెల్లించాల్సి ఉంది. తమకు ఇంత వరకూ నిధులు అందలేదని బాండ్‌ కొనుగోలు చేసిన వారు వార్త సంస్థలకు వెల్లడించారు. బాండు కొనుగోలుదారులతో ఎవర్‌గ్రాండ్‌కు ఉన్న ఒప్పందం ప్రకారం మరో 30 రోజుల అదనపు గడువు ఉంటుంది. అప్పటికీ చెల్లించలేకపోతే ఎగవేతదారుగా ప్రకటిస్తారు. గత వారం ఈ సంస్థ విదేశీ పెట్టుబడిదారులకు చెల్లించాల్సిన 83.5 మిలియన్‌ డాలర్ల వడ్డీ చెల్లింపులు చేయలేదు.

వడ్డీ చెల్లించని విషయంపై ఎవర్‌గ్రాండ్‌ ఇప్పటి వరకూ ఎటువంటి ప్రకటన చేయలేదు. ఈ సంస్థకు మొత్తం 300 బిలియన్‌ డాలర్ల మేరకు అప్పులు ఉన్నాయి. దేశంలో ఉద్రిక్తతలు చెలరేగుతాయన్న ఆందోళనతో తొలుత చైనాలో అప్పులు చెల్లించేందుకు ప్రాధాన్యమిస్తోంది.

ఎవర్‌గ్రాండ్‌ కుప్పకూలితే ఇప్పటికే చైనాలో ఖాళీగా ఉన్న 6.5 కోట్ల ఇళ్ల ధరల్లో పతనం మొదలవుతుంది. చైనీయుల సంపదలో చాలా భాగం రియల్‌ఎస్టేట్‌ రంగంలో ఉంది. ఫలితంగా చైనీయుల వ్యయాలు గణనీయంగా తగ్గే ప్రమాదం ఉంది. అంతేకాదు చైనా బాండ్‌ మార్కెట్‌పై కూడా ప్రతికూల ప్రభావం చూపిస్తుంది.  ఇప్పటికే చైనాకు 92 ట్రిలియన్‌ డాలర్ల అప్పు ఉంది. ఇది ఆ దేశ జీడీపీతో పోలిస్తే 353 శాతం ఎక్కువ. ఇప్పుడు కీలకమైన రియల్‌ ఎస్టేట్‌ మార్కెట్‌ మందగిస్తే చైనాకు ఆర్థిక కష్టాలు తప్పవు. చైనాకు ఆర్థిక కష్టాలు వస్తే ఐరోపా దేశాల విలాసవంతమైన వస్తువుల తయారీ పరిశ్రమలపై ప్రతికూల ప్రభావం పడుతుంది. ఈ రంగాల 50శాతం ఆదాయం చైనా నుంచి వస్తోంది. చైనా వద్ద దాదాపు 1.1 ట్రిలియన్‌ డాలర్ల అమెరికా బాండ్లు ఉన్నాయి. ఆసియాలో చాలా దేశాలకు చైనా అతిపెద్ద వాణిజ్య భాగస్వామి. చైనాలో వచ్చే చిన్న ఆర్థిక సంక్షోభం కూడా ఈ దేశాల వ్యాపారంపై ప్రతికూల ప్రభావం చూపవచ్చు.