ATM: దేశంలో ఎన్ని ఏటీఎంలు ఉన్నాయో తెలుసా?

దిల్లీ: దేశవ్యాప్తంగా ఈ ఏడాది సెప్టెంబరు నాటికి 2.13 లక్షల ఏటీఎంలు ఉన్నాయని కేంద్ర ఆర్థిక శాఖ వెల్లడించింది. వీటిలో 47 శాతం గ్రామీణ, సెమీ అర్బన్‌ ప్రాంతాల్లో ఉన్నట్లు తెలిపింది. ఆర్‌బీఐ గణాంకాల ప్రకారం.. షెడ్యూల్డు వాణిజ్య బ్యాంకులు 2,13,145 ఏటీఎంలు ఏర్పాటు చేశాయి. వీటితో పాటు బ్యాంకింగేతర సంస్థలు ఏర్పాటు చేసే వైట్‌ లేబుల్‌ ఏటీఎం(డబ్ల్యూఎల్‌ఏ)లు మరో 27,837 ఉన్నాయి. ఏటా 1000 ఏటీఎంలను ఏర్పాటు చేయాలని డబ్ల్యూఎల్‌ఏ ఆపరేటర్లకు లక్ష్యంగా నిర్దేశించారు. వీటిని మెట్రో, అర్బన్‌, సెమీ-అర్బన్‌ ప్రాంతాల్లో 1:2:3 నిష్పత్తిలో పంచాలని ఆదేశించినట్లు లోక్‌సభకు ఇచ్చిన లిఖితపూర్వక సమాధానంలో కేంద్ర ఆర్థిక శాఖ సహాయ మంత్రి భగవత్‌ కరాడ్‌ తెలిపారు.