ఈక్విటీ ఎంఎఫ్‌ల్లోకి రూ.10 వేల కోట్ల పెట్టుబడులు!

దిల్లీ: మే నెలలో రికార్డు స్థాయిలో భారత ఈక్విటీ మ్యూచువల్‌ ఫండ్లలోకి దాదాపు రూ.10 వేల కోట్లు నికర పెట్టుబడులు వచ్చి చేరాయి. మార్చి 2020 తర్వాత ఇదే అత్యధికం. మార్చిలో వచ్చిన రూ.9,115 కోట్లు, ఏప్రిల్‌లో వచ్చిన రూ.3,437 కోట్లతో పోలిస్తే పెట్టుబడులు ఈసారి భారీ స్థాయిలో పుంజుకున్నాయి. అంతకుముందు జులై 2020 నుంచి మొదలుకొని ఫిబ్రవరి 2021 వరకు మ్యూచువల్‌ ఫండ్ల నుంచి పెట్టుబడులు వెనక్కి మళ్లిన విషయం తెలిసిందే.

మరోవైపు డెట్‌ మ్యూచువల్‌ ఫండ్ల నుంచి మే నెలలో దాదాపు రూ.44,512 కోట్ల పెట్టుబడులు వెనక్కి వెళ్లాయి. మొత్తంగా మే నెలలో మ్యూచువల్‌ ఫండ్లలోని అన్ని సెగ్మెంట్ల నుంచి రూ.38,602 కోట్లు వెనక్కి వెళ్లాయి. అదే ఏప్రిల్‌లో రూ.92,906 కోట్లు వచ్చి చేరాయి. ఈక్విటీ లింక్డ్‌ సేవింగ్స్‌ స్కీమ్స్‌ మినహా దాదాపు అన్ని ఈక్విటీ స్కీముల్లోకి పెట్టుబడులు భారీగా వచ్చి చేరాయి. దీంతో మ్యూచువల్‌ ఫండ్‌ పరిశ్రమ మార్కెట్‌ విలువ రూ.33 లక్షల కోట్లతో జీవనకాల గరిష్ఠానికి చేరింది.