ఇల్లు కొంటున్నారా? ఈ ఖర్చుల గురించి కూడా తెలుసుకోండి..
ఇల్లు కొనుగోలు చేసేందుకు ప్లాన్ చేస్తున్నవారు అదనపు ఖర్చుల గురించి కూడా తెలుసుకుంటే.. సరైన ఆర్ధిక ప్రణాళికను సిద్ధంచేసుకుని ముందుకు వెళ్లేందుకు అవకాశం ఉంటుంది.
సొంత ఇల్లు అనేది ప్రతీ ఒక్కరి కల. చాలామందికి జీవిత లక్ష్యం. సొంత ఇల్లు ఉంటే భద్రతగా, సురక్షితంగా ఉన్న అనుభూతిని పొందుతారు. అప్పటి వరకు అద్దె ఇంటిలో ఉండి కష్టపడి సంపాదించిన డబ్బుతో ఇల్లు కొనుగోలు చేస్తే ఉండే తృప్తి వేరుగా ఉంటుంది. స్వేచ్ఛగా జీవిస్తున్న ఫీలింగ్ కలుగుతుంది. అయితే ఇంటి కొనుగోలు అంత సులభం కాదు. ఒక వ్యక్తి జీవితంలో చేసే అతి పెద్ద పెట్టుబడులలో ఇదీ ఒకటి. సరైన ప్రణాళిక లేకుండా సొంతింటి కలను సాకారం చేసుకోవడం కష్టమవుతుంది.
ఒక ప్రణాళిక ప్రకారం బడ్జెట్ వేసుకున్నప్పటికీ.. కొనుగోలు ప్రాసెస్ మొత్తం పూర్తయ్యే సరికి అనుకున్న దానికంటే ఎక్కువ మొత్తం ఖర్చువుతుంది. దీని వల్ల అప్పులు చేస్తుంటారు. అలా జరగకుండా ఉండాలంటే.. ఇంటి కొనుగోలుకు సంబంధించి వాస్తవ ఖర్చులను ముందుగా తెలుసుకోవాలి. ఇంటి కోసం బిల్డర్ లేదా విక్రేతని సంప్రదించినప్పుడు.. వారు చెప్పిన అంచనా వ్యాయానికి వాస్తవ వ్యయానికి మధ్య వ్యత్యాసం ఉంటుంది. దీనికి కారణం అదనపు ఖర్చులు. వీటి కలయికతో అప్పటి వరకు ఉన్న ఆర్థిక ప్రణాళిక దారి తప్పుతుంది.
ఇల్లు కొనుగోలు చేసేందుకు ప్లాన్ చేస్తున్నవారు అదనపు ఖర్చుల గురించి కూడా తెలుసుకుంటే.. సరైన ఆర్ధిక ప్రణాళికను సిద్ధంచేసుకుని ముందుకు వెళ్లేందుకు అవకాశం ఉంటుంది. దీనివల్ల చివరి నిమిషంలో ఇబ్బందులు పడకుండా నివారించవచ్చు.
ఇంటి కొనుగోలు చేసినప్పుడు ఉండే 5 ప్రధాన అదనపు ఖర్చులను ఇప్పుడు తెలుసుకుందాం..
1. స్టాంప్ డ్యూటి..
ఆస్తి లావాదేవీలపై ప్రభుత్వం విధించే తప్పనిసరి పన్ను స్టాంప్ డ్యూటి. ఇది అమ్మకపు ఒప్పందాన్ని ధృవీకరిస్తుంది. ఆస్తి అమ్మకం లేదా కొనుగోలుకు సాక్ష్యంగా పనిచేస్తుంది. ఇల్లు ఉన్న రాష్ట్రం, ఇంటివిలువ తదితర అంశాలపై ఆధారపడి ఆస్తి విలువలో 4 నుంచి 7 శాతం మధ్య స్టాంప్ డ్యూటి ఉంటుంది. ఉదాహరణకు, మీరు కొనుగోలు చేస్తున్న ఇంటి విలువ రూ. 50 లక్షలు ఉంటే, స్టాంప్ డ్యూటీ రూ.2 లక్షల నుంచి రూ.3.5 లక్షల వరకు ఉంటుంది. ఇది ఇంటి కొనుగోలుకు అయ్యే ఖర్చును పెంచుతుంది.
గుర్తించుకోండి.. స్టాంప్ డ్యూటిని రాష్ట్ర ప్రభుత్వాలు నిర్ణయిస్తాయి. అలాగే ఆస్తి ఉన్న ప్రదేశం బట్టి కూడా స్టాంప్ డ్యూటి మారుతుంది. అంటే ఆస్తి గ్రామీణ ప్రాంతంలో ఉంటే స్టాంప్ డ్యూటి కొంత తక్కువ ఉండచ్చు. అదే పట్టణ ప్రాంతాలలో ఉంటే పెరగొచ్చు. కొన్ని రాష్ట్ర ప్రభుత్వాలు మహిళల పేరుపై, అఫర్డ్బుల్ ఇళ్లు కొనుగోలు చేసిన వారికి స్టాంప్ డ్యూటిపై 1శాతం రాయితీని అందిస్తున్నాయి. అందువల్ల ఒక రాష్ట్రంలో అంతర్గంగా వర్తించే స్టాంప్ డ్యూటిపై కూడా గణనీయమైన వ్యత్యాసం ఉండచ్చు.
2. రిజిస్ట్రేషన్ ఛార్జీలు..
కొనుగోలు సమయంలో ప్రభుత్వం విధించే మరో తప్పనిసరి ఖర్చు రిజిస్ట్రేషన్ ఛార్జీలు. కొనుగోలుదారుని పేరుపై ఆస్తిని నమోదు చేయడం, ఆస్తి యాజమాన్య రికార్డులను అప్డేట్ చేసేందుకు రిజిస్ట్రేషన్ ఛార్జీలు విధిస్తారు. ఈ ఛార్జీలు ఇంటి విలువలో 1శాతం ఉంటాయి. అంటే రూ. 50 లక్షల విలువైన ఇంటిని కొనుగోలు చేస్తే రూ.50వేల రిజిస్ట్రేషన్ ఛార్జీలకు చెల్లించాలి. ఇవి స్టాంప్డ్యూటికి అదనం.
3. వస్తుసేవల పన్ను(జీఎస్టీ)..
నిర్మాణంలో ఉన్న ఇంటిని కొనుగోలు చేస్తే జీఎస్టీ వర్తిస్తుంది. నిర్మాణంలో అఫర్డ్బుల్ ఇళ్లకు ఆస్తివిలువలో 1శాతం.. మిగిలిన వాటికి 5శాతం జీఎస్టీ వర్తిస్తుంది. ఇక్కడ అఫర్డ్బుల్ హౌస్ అంటే.. ఇంటి విలువ రూ.45 లక్షల లోపు ఉండి.. మెట్రో నగరాలలో అయితే 60 చదరపు మీటర్లు, ఇతర ప్రదేశాలలో అయితే 90 చదరపు మీటర్ల కంటే తక్కువ విస్తీర్ణంలో ఇంటి నిర్మాణం ఉండాలి.
ఉదాహరణకి, నిర్మాణంలో ఉన్న అఫర్డ్బుల్ హౌస్ విలువ రూ.40 లక్షలు ఉంటే రూ.40వేలు జీఎస్టీ చెల్లించాలి. ఒకవేళ నిర్మాణంలో ఉన్న ఇంటి విలువ రూ.50 లక్షల ఉంటే రూ. 2.5 లక్షల వరకు జీఎస్టీ వర్తిస్తుంది. పూర్తైన ఇల్లు అంటే నివసించేందకు సిద్ధంగా ఉన్న ఇల్లు లేదా రీసేల్ చేసే పాత ఇళ్లపై జీఎస్టీ వర్తించదు.
4. ముందస్తు నిర్వహణ ఛార్జీలు..
ఆస్తి నిర్వహణ ఛార్జీలు ఇంటి ఖర్చును గణనీయంగా ప్రభావితం చేస్తాయి. బిల్డర్లు వీటిని ఒకటి లేదా రెండు సంవత్సరాలు ముందుగానే తీసుకోవచ్చు, ఆస్తి, అపార్ట్మెంట్ కాంప్లెక్స్ పరిమాణం, స్థానాన్ని బట్టి ఈ మొత్తం లక్షల్లో ఉంటుంది. సాధారణంగా, నిర్వహణ ఛార్జీలలో భవనం భద్రత, లిఫ్ట్ ఛార్జీలు, ఆస్తి నిర్వహణ ఖర్చులు, నీరు, విద్యుత్ ఛార్జీలు ఉంటాయి.
5. పార్కింగ్ ఛార్జీలు..
చాలా మంది గృహ కొనుగోలు దారులు ఇళ్లు కొనుగోలు చేస్తారు కానీ వాహనల పార్కింగ్ ఛార్జీలు గురించి ఆలోచించరు. సొంత ఇల్లు కాబట్టి పార్కింగ్ ఛార్జీలు చెల్లించాల్సి అవసరం లేదని భావిస్తారు. కానీ నిజానికి హౌసింగ్ సొసైటీలు లేదా బిల్డర్లు ప్రత్యేక పార్కింగ్ స్థలం కోసం ఛార్జీలను విధిస్తారు. ఒకవేళ మీకు ఒకటి కంటే ఎక్కువ వాహనాలు ఉంటే, అదనపు పార్కింగ్ స్థలాన్ని కొనుగోలు చేయాల్సి వస్తుంది. ఇందకోసం అదనపు డబ్బు చెల్లించాల్సి ఉంటుంది. ఇవి అందరికి ఒకేలా ఉండవు. మీరు ఇళ్లు కొనుగోలు చేసిన సొసైటిపై ఆధారపడి, పార్కింగ్ ఛార్జీలు ఒకేసారి లేదా వార్షికంగా వసూలు చేయవచ్చు. ఇవి వేలల్లో ఉండచ్చు లేదా లక్షల్లోనూ ఉండచ్చు.
వీటితో పాటుగా, రీసేల్ లావాదేవీల విషయంలో,ఆస్తి యాజమాన్యం బదిలీ కోసం స్థానిక సంస్థకు ట్రాన్స్ఫర్ ఆఫ్ మెమోరాండమ్ (TM) ఛార్జీలను లేదా అసోసియేషన్కు బదిలీ ఛార్జీలను చెల్లించాల్సి ఉంటుంది. కాంప్లెక్స్లోని మెరుగైన ప్రదేశంలో యూనిట్ కోసం బిల్డర్ మీనుంచి ప్రిఫరెన్షియల్ లొకేషన్ ఛార్జీలు (PLC) వసూలు చేయవచ్చు. ఇవి స్థిరంగా ఉండవు. బిల్డర్ నుంచి బిల్డర్కి మారుతూ ఉంటాయి. ఒకవేళ మీకు నచ్చిన విధంగా ఇంటీరియర్ డిజైన్ చేయించుకోవాలంటే అదనపు డబ్బును వెచ్చించాల్సి ఉంటుంది.
చివరిగా..
ఈ అదనపు ఖర్చులు అన్నీ కలిపి మీ ఇంటి వాస్తవ వ్యయం 10 నుంచి 15 శాతం పెరగవచ్చు. ఇక్కడ ఒక విషయాన్ని గుర్తించుకోవాలి. మీరు ఒకవేళ రుణం తీసుకుని ఇళ్లు కొనుగోలు చేస్తుంటే.. బ్యాంకులు ఇంటి విలువను మాత్రమే పరిగణలోకి తీసుకుని దానిపై మాత్రమే అనుమతించిన శాతం వరకు రుణం మంజూరు చేస్తాయి. ఈ అదనపు ఖర్చలను పరిగణలోకి తీసుకోవు. అందువల్ల రుణం తీసుకుని కొనుగోలు చేసే వారు ఈ అదనపు ఖర్చులను కూడా లెక్కించి..డౌన్పేమెంట్తో పాటు ఈ ఛార్జీలకు అయ్యే మొత్తాన్ని కూడా సొంతంగా సమకూర్చుకోవాల్సి ఉంటుంది.
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
తాజా వార్తలు (Latest News)
-
జాబిల్లిపై చైనా ముందే కాలుమోపితే.. అక్రమణలే: నాసా అధిపతి వ్యాఖ్యలు
-
తెలుగు రాష్ట్రాల్లో ఎన్నికలు.. తొలిరోజు నామినేషన్ వేసిన కీలక నేతలు
-
భారత క్రికెట్లో నీ భాగస్వామ్యం ఏంటి?: హర్షా భోగ్లేపై మాజీ క్రికెటర్ ఆగ్రహం
-
జగన్పై రాయి దాడి కేసు.. ఆ ఆరుగురి వివరాలు తెలపాలంటూ కోర్టులో పిటిషన్
-
ఈనాడు.నెట్లో టాప్ 10 వార్తలు @ 1 PM
-
ప్రపంచంలో బెస్ట్ ఎయిర్పోర్టులివే.. భారత విమానాశ్రయాలు ఏ స్థానంలో..?