సంయుక్తంగా టోకనైజేషన్ ను విడుదల చేసిన గూగుల్, మాస్టర్ కార్డు..

ఆన్ లైన్ లావాదేవీలను మరింత సురక్షితంగా మార్చేందుకు భారత జాతీయ చెల్లింపుల కార్పొరేషన్‌ (ఎన్‌పీసీఐ) టోకనైజేషన్‌ వ్యవస్థను అందుబాటులోకి తీసుకొచ్చిన విషయం తెలిసిందే. దీనిలో భాగంగా గూగుల్, మాస్టర్ కార్డు సంయుక్తంగా తమ వినియోగదారులు వారి క్రెడిట్, డెబిట్ కార్డ్‌లను ఉపయోగించి సురక్షితంగా లావాదేవీలు జరిపేందుకు వీలు కల్పించే టోకనైజేషన్ ను విడుదల చేస్తున్నట్లు ప్రకటించాయి. వినియోగదారులు తమ క్రెడిట్ లేదా డెబిట్ కార్డు వివరాలైన కార్డు నెంబర్, ఎక్స్‌పైరీ డేట్ వంటి వాటి అవసరం లేకుండానే టోకనైజేషన్ ద్వారా సురక్షితమైన డిజిటల్ చెల్లింపులు చేయవచ్చు.

గూగుల్ పే ఆండ్రాయిడ్ వినియోగదారులు తమ మాస్టర్ కార్డు డెబిట్, క్రెడిట్ కార్డు ద్వారా భారత్ క్యూఆర్ కోడ్ ను స్కాన్ చేయడం, అలాగే యాప్‌లో లావాదేవీలు చేయడం వంటి వాటిని సురక్షితంగా చేయవచ్చునని సంస్థ ప్రకటనలో తెలిపింది. దీని కోసం వినియోగదారులు గూగుల్ పే యాప్‌లో తమ కార్డు వివరాలను నమోదు చేసి, అనంతరం ఓటీపీని ఎంటర్ చేసి వన్-టైమ్ సెటప్ చేసుకోవాల్సి ఉంటుంది.