ఆరోగ్య బీమా క్లెయింలకు ప్రత్యేక సేవా కేంద్రం

ఎస్‌బీఐ జనరల్‌ ఇన్సూరెన్స్‌

ఈనాడు, హైదరాబాద్‌: ఆరోగ్య బీమా పాలసీల సమాచారం, క్లెయింల పరిష్కారం కోసం ప్రత్యేకంగా వినియోగదారుల సేవాకేంద్రాన్ని ఏర్పాటు చేస్తున్నట్లు ఎస్‌బీఐ జనరల్‌ ఇన్సూరెన్స్‌ తెలిపింది. కొవిడ్‌-19 కేసులు పెరుగుతున్న దృష్ట్యా, పాలసీదారులకు సహాయం చేసేందుకు ఇది 24 గంటలూ అందుబాటులో ఉంటుందని వెల్లడించింది. ఈ హెల్త్‌లైన్‌ ద్వారా పాలసీలు, క్లెయింలకు సంబంధించిన ఏ సమస్యనైనా ఫిర్యాదు చేయొచ్చు. దీనికోసం ప్రత్యేక టోల్‌ఫ్రీ నెంబరు ఏర్పాటు చేయబోతున్నట్లు సంస్థ పేర్కొంది.

ఏసీసీ లాభంలో 74% వృద్ధి

దిల్లీ: మార్చి 2021తో ముగిసిన త్రైమాసికంలో సిమెంటు తయారీ కంపెనీ ఏసీసీ ఏకీకృత నికర లాభం రూ.562.59 కోట్లకు చేరింది. 2020 ఇదే త్రైమాసికంలో నమోదైన లాభం రూ.323.02 కోట్లతో పోలిస్తే ఇది 74.17% అధికం కావడం విశేషం. మొత్తం ఆదాయం సైతం రూ.3501.71 కోట్ల నుంచి 22.57 శాతం వృద్ధితో రూ.4291.97 కోట్లకు చేరుకుంది. కంపెనీ మొత్తం వ్యయాలు కూడా రూ.3,083.78 కోట్ల నుంచి రూ.3,586.19 కోట్లకు పెరిగాయి. జనవరి-డిసెంబరును కంపెనీ ఆర్థిక సంవత్సరంగా పరిగణిస్తుంది. ‘తొలి త్రైమాసికంలో అత్యధిక ఆదాయం, నిర్వహణ ఎబిటా నమోదు చేశాం. మా వ్యయ నియంత్రణ ప్రాజెక్టు ‘పర్వత్‌’ సరిగ్గా పనిచేస్తోంద’ని కంపెనీ ఎండీ, సీఈఓ శ్రీధర్‌ బాలకృష్ణన్‌ పేర్కొన్నారు.  సిమెంటు విభాగంలో ఆదాయం 26.25% హెచ్చి రూ.3,980.84 కోట్లకు చేరుకుంది. ‘ప్రభుత్వం మౌలిక రంగంపై వ్యయాలు పెంచనున్నందున వచ్చే కొద్ది నెలల్లో జాగ్రత్తతో కూడిన సానుకూల భవిష్యత్‌ను అంచనా వేస్తున్న’ట్లు కంపెనీ తెలిపింది. ‘మా ఉద్యోగుల్లో 70% వరకు అర్హత గల వారికి టీకా వేయించాం. పరిస్థితులను జాగ్రత్తగా గమనిస్తున్నామ’ని వివరించింది.
బీఎస్‌ఈలో సోమవారం ఏసీసీ షేరు ధర 0.26% నష్టంతో రూ.1876.85 వద్ద స్థిరపడింది.