GST Council: జీఎస్టీపై రెండు కమిటీల ఏర్పాటు

దిల్లీ: వస్తు, సేవల పన్ను (జీఎస్టీ)కు సంబంధించి కేంద్ర ఆర్థిక మంత్రిత్వ శాఖ రెండు కమిటీలను సోమవారం ఏర్పాటు చేసింది. జీఎస్టీ నుంచి మినహాయించాల్సిన వస్తువులు, ప్రస్తుత శ్లాబ్‌ రేట్లు, జీఎస్టీ ఎగవేతదారుల మూలాలు, ఐటీ సిస్టమ్స్‌లో మార్పులు తదితర అంశాలపై ఈ కమిటీలు సమీక్షించి నివేదిక ఇవ్వాల్సి ఉంటుంది. సెప్టెంబర్‌ 17న జరిగిన జీఎస్టీ మండలి సమావేశంలో రెండు మంత్రివర్గ ఉపసంఘాలు ఏర్పాటు చేయాలన్న నిర్ణయం మేరకు ఈ కమిటీలు ఏర్పాటయ్యాయి.

జీఎస్టీ పన్ను నుంచి మినహాయించాల్సిన వస్తువులు, శ్లాబుల విలీనం తదితర అంశాలపై ఏడుగురు సభ్యులతో కూడిన కమిటీని కేంద్రం నియమించింది. ఈ ప్యానెల్‌కు కర్ణాటక ముఖ్యమంత్రి బసవరాజ్‌ బొమ్మై నేతృత్వం వహించనున్నారు. పశ్చిమ బెంగాల్‌ ఆర్థిక మంత్రి అమిత్‌ మిత్రా, కేరళ ఆర్థిక మంత్రి కేఎన్‌ బాలగోపాల్‌, బిహార్‌ డిప్యూటీ సీఎం తార్కిషోర్‌ ప్రసాద్‌ ఇందులో సభ్యులుగా ఉంటారు. ఈ కమిటీ రెండు నెలల్లో నివేదిక సమర్పించాల్సి ఉంటుంది.

జీఎస్టీ సిస్టమ్‌లో తీసుకురావాల్సిన సంస్కరణలు, పన్ను ఎగవేత మూలాలు, ఆదాయానికి గండి కొడుతున్న అంశాలపై దృష్టి సారించేందుకు ఎనిమిది మందితో మరో కమిటీని కేంద్ర ఏర్పాటు చేసింది. ఈ కమిటీకి మహారాష్ట్ర డిప్యూటీ సీఎం అజిత్‌ పవార్‌ నేతృత్వం వహించనున్నారు. దిల్లీ డిప్యూటీ సీఎం మనీశ్‌ సిసోడియా, తమిళనాడు ఆర్థిక మంత్రి త్యాగరాజన్‌, ఛత్తీస్‌గఢ్ ఆర్థిక మంత్రి టీఎస్‌ సింగ్‌ డియో సభ్యులుగా ఉంటారు.