ఎన్‌హెచ్‌పీసీ లాభం రూ.464 కోట్లు

ఒక్కో షేరుకు 35 పైసల తుది డివిడెండ్‌

దిల్లీ: ప్రభుత్వ రంగ జల విద్యుత్‌ సంస్థ ఎన్‌హెచ్‌పీసీ గత ఆర్థిక సంవత్సరం మార్చి త్రైమాసికంలో రూ.464.60 కోట్ల ఏకీకృత నికర లాభాన్ని నమోదు చేసింది. 2019-20 ఇదే త్రైమాసికంలో సంస్థ నమోదు చేసిన రూ.258.83 కోట్ల లాభంతో పోలిస్తే ఇది 80 శాతం అధికం. మొత్తం ఆదాయం మాత్రం రూ.2,382.36 కోట్ల నుంచి రూ.2,094.30 కోట్లకు తగ్గింది. 2020-21 పూర్తి ఆర్థిక సంవత్సరానికి ఏకీకృత నికర లాభం రూ.3,582.13 కోట్లకు చేరింది. 2019-20లో ఇది రూ.3,344.91 కోట్లు మాత్రమే. ఇదే సమయంలో మొత్తం ఆదాయం రూ.10,776.64 కోట్ల నుంచి రూ.10,705.04 కోట్లకు తగ్గింది. రూ.10 ముఖ విలువ కలిగిన ఒక్కో షేరుకు 3.5 శాతం చొప్పున (35 పైసలు) తుది డివిడెండ్‌ చెల్లించేందుకు డైరెక్టర్ల బోర్డు సిఫారసు చేసింది. 2020-21 ఆర్థిక సంవత్సరం మార్చిలో చెల్లించిన రూ.1.25 మధ్యంతర డివిడెండ్‌కు ఇది అదనమని కంపెనీ వెల్లడించింది.