Ola Electric: ఈ మోటార్‌ సైకిళ్లపై ఓలా దృష్టి..!

ఇంటర్నెట్‌డెస్క్‌: ఓలా ఎలక్ట్రిక్‌ సంస్థ ఇప్పుడు ఈ-మోటార్‌ సైకిళ్లపై దృష్టిపెట్టింది. ఈ విషయాన్ని కంపెనీ సీఈవో భవేష్‌ అగర్వాల్‌ ధ్రువీకరించారు. వచ్చే ఏడాది నుంచి సరికొత్త ఎలక్ట్రిక్‌ మోటార్‌సైకిళ్లు, చౌకగా స్కూటర్ల అభివృద్ధిపై దృష్టిపెట్టనున్నట్లు ఆయన ట్విటర్‌లో వెల్లడించారు. ఈ అంశానికి సంబంధించిన ఒక ఆర్టికల్‌ను రీట్వీట్‌ చేస్తూ ‘యస్‌ నెక్స్ట్‌ ఇయర్‌’ అని పేర్కొన్నారు. గతంలో ఆయన తన బ్లాగ్‌లో కూడా ఈ విషయాన్ని ప్రస్తావించారు. తమ కంపెనీ ఉత్పత్తులను ఈ-మోటార్‌ సైకిళ్ల నుంచి ఈ-కార్ల వరకు విస్తరించే అవకాశం ఉందని పేర్కొన్నారు. 

ఈ ఏడాది సెప్టెంబర్‌లో ఓలా ఎలక్ట్రిక్‌ సంస్థ 200 మిలియన్‌ డాలర్లను సమీకరించింది. వాహనాల ఉత్పత్తిని వేగవంతం చేయడం, ఎలక్ట్రిక్‌ మోటార్‌ సైకిళ్ల అభివృద్ధిపై దృష్టిపెట్టడం వంటివి చేస్తోంది. ‘మిషన్‌ ఎలక్ట్రిక్‌’ను ముందుకు తీసుకెళ్లేందుకు ఈ నిధులను సమీకరించినట్లు భవేష్‌ పేర్కొన్నారు.

ఈ ఏడాది ఆగస్టులో ఓలా సంస్థ ఎస్‌1, ఎస్‌1ప్రో వాహనాలను మార్కెట్లోకి విడుదల చేసింది. దిల్లీ, బెంగళూరు, కోల్‌కతా, అహ్మదాబాద్‌ వంటి నగరాల్లో ఈ సంస్థ వాహనాలను టెస్ట్‌డ్రైవ్‌ల కోసం వినియోగదారులకు  అందుబాటులోకి తెచ్చింది. త్వరలోనే ఈ వాహనాల డెలివరీలు కూడా మొదలుపెట్టనుంది. డిసెంబర్‌లో రెండో విడత విక్రయాలను చేపట్టనుంది.