IT Returns: 4.51 కోట్లకు పైగా ఐటీ రిటర్నుల దాఖలు

ముంబయి: 2020-21 ఆర్థిక సంవత్సరానికి సంబంధించి డిసెంబరు 26 వరకు 4.51 కోట్లకు పైగా ఆదాయపు పన్ను (ఐటీ) రిటర్నులు దాఖలయ్యాయని ఆర్థిక శాఖ వెల్లడించింది. ఆదివారం ఒక్కరోజే 8,77,721 ఐటీఆర్‌లు దాఖలైనట్లు పేర్కొంది. ఈనెల 31 వరకు వీటి సమర్పణకు గడువు ఉందని తెలిపింది. ఇప్పటి వరకు సమర్పించిన 4.51 కోట్ల ఐటీఆర్‌లలో ఐటీఆర్‌-1లు 2.44 కోట్లు, ఐటీఆర్‌-4లు 1.12 కోట్లు ఉన్నాయని పేర్కొంది. చిన్న, మధ్యస్థాయి పన్ను చెల్లింపుదారుల కోసం ఐటీఆర్‌ ఫారం 1 (సహజ్‌), ఐటీఆర్‌ ఫారం 4 (సుగమ్‌) ఉన్న విషయం తెలిసిందే. వేతనం, ఒక ఇళ్లు సహా ఇతర ఆదాయ మార్గాల ద్వారా రూ.50 లక్షల వరకు ఆదాయం ఉన్నవారు సహజ్‌ను సమర్పిస్తారు. ఇక ఐటీఆర్‌-4ను రూ.50 లక్షల కంటే ఎక్కువ ఆదాయం ఉన్న వ్యక్తులు, హిందూ అవిభాజ్య కుటుంబాలు సమర్పిస్తాయి. క్రితం ఆర్థిక సంవత్సంలో మొత్తం 5.95 కోట్ల ఐటీఆర్‌లు దాఖలయ్యాయి.