Paytm GMV: పేటీఎం స్థూల విక్రయాల విలువ రూ.1.96 లక్షల కోట్లు

దిల్లీ: సెప్టెంబరుతో ముగిసిన త్రైమాసికంలో డిజిటల్‌ చెల్లింపులు, ఆర్థిక సేవల సంస్థ పేటీఎం ‘స్థూల విక్రయాల విలువ(జీఎంవీ)’ రూ.1,95,600కోట్లుగా నమోదైంది. క్రితం ఏడాది నమోదైన రూ.94,700కోట్లతో పోలిస్తే రెండింతల వృద్ధి రికార్డయింది. ఈ కంపెనీ షేర్లు స్టాక్‌ ఎక్స్ఛేంజీల్లో నమోదైన తర్వాత.. కార్యకలాపాల పనితీరుకు సంబంధించిన నివేదికను విడుదల చేయడం ఇదే తొలిసారి.

పేటీఎం యాప్‌ లేదా సంస్థ అందిస్తున్న ఇతర ఉత్పత్తుల ద్వారా వ్యాపారులకు చెల్లించే మొత్తాన్ని కంపెనీ జీఎంవీగా పేర్కొంటోంది. దీంట్లో వినియోగదారుల మధ్య జరిగే నగదు బదిలీ వంటి లావాదేవీలను మినహాయిస్తారు. క్రితం ఏడాది అక్టోబరు నెలలో రూ.36,000కోట్లుగా నమోదైన జీఎంవీ గత నెలలో 131 శాతం పెరిగి రూ.83,200 కోట్లకు పెరిగింది.

ఇక ఏటా పేటీఎం ద్వారా లావాదేవీలు జరపుతున్న వినియోగదారుల సంఖ్య జులై-సెప్టెంబరు త్రైమాసికంలో 33 శాతం పెరిగి 5.7 కోట్లకు చేరింది. ఇక క్రితం ఏడాది ఇదే త్రైమాసికంలో మంజూరు చేసిన రూ.210కోట్ల రుణాలు.. 500 శాతం పెరిగి రూ.1,260కోట్లకు చేరాయి. ఒక్క అక్టోబరులో రూ.630కోట్ల రుణాలు మంజూరయ్యాయి. రుణాల సంఖ్య సైతం భారీగా పెరిగి 28.41 లక్షలకు చేరింది.