Petrol: 16 రోజుల్లో రూ. 4 పెంపు 

దిల్లీ: మే నెలలో ఎండ వేడితో పాటు ఇంధన ధరలు మండిపోయాయి. వరుస పెంపులతో వినియోగదారుల గుండెలు గుబేలన్నాయి. కొన్ని చోట్ల పెట్రోల్‌ ధర ఏకంగా సెంచరీ దాటేయడంతో వాహనం బయటకు తీయాలంటేనే ప్రజలు బెంబేలెత్తిపోతున్నారు. ఈ నెలలో చమురు సంస్థలు 16 సార్లు  ఇంధన ధరలను పెంచాయి. మొత్తంగా పెట్రోల్‌, డీజిల్‌ ధరలు రూ. 4 వరకు పెరిగాయి.

మే 3 తర్వాత నుంచి దేశంలో ఇంధన ధరలు పెరుగుతూ పోతున్నాయి. సోమవారం కూడా చమురు సంస్థలు పెట్రోల్‌ ధర 28-29 పైసలు, డీజిల్‌ ధరను 26-28 పైసల వరకు పెంచాయి. దీంతో దేశ రాజధానిలో లీటర్‌ పెట్రోల్‌ ధర రూ. 94.23కు చేరగా.. డీజిల్‌ ధర 85.15గా ఉంది. ఇక వాణిజ్య రాజధాని ముంబయిలో పెట్రోల్‌ ధర గత వారమే సెంచరీ కొట్టగా.. నేడు రూ. 100.47కు చేరింది. అక్కడ డీజిల్‌ ధర రూ. 92.45గా ఉంది.

మొత్తంగా ఈ నెలలో లీటర్‌ పెట్రోల్‌ ధరపై రూ. 3.83 పెంచగా.. డీజిల్‌ ధర రూ. 4.42 పెరిగింది. వ్యాట్‌, స్థానిక పన్నులను బట్టి ఇంధన ధరలు ఒక్కో రాష్ట్రంలో ఒక్కో రకంగా ఉంటాయి. అంతర్జాతీయ ధరలకు అనుగుణంగా చమురు సంస్థలు ఈ ధరలను రోజువారీగా సవరిస్తుంటారు.  

ప్రధాన నగరాల్లో ఇంధన ధరలు ఇలా..

దిల్లీ: పెట్రోల్‌ రూ. 94.23, డీజిల్‌ రూ. 85.15

ముంబయి: పెట్రోల్‌ రూ. 100.47, డీజిల్‌ రూ. 92.45

కోల్‌కతా: పెట్రోల్‌ రూ. 94.25, డీజిల్‌ రూ. 88.00

చెన్నై: పెట్రోల్‌ రూ. 95.76, డీజిల్‌ రూ. 89.90

హైదరాబాద్‌: పెట్రోల్‌ రూ. 97.93, డీజిల్‌ రూ. 92.83