హైదరాబాద్‌ సహా ప్రధాన నగరాల్లో

ప్లాట్ల వ్యాపారంలోకి పూర్వాంకర
రూ.825 కోట్లతో 6 ప్రాజెక్టులు

దిల్లీ: నివాసాలకు అనుగుణంగా ప్లాట్ల (ఖాళీ స్థలాల)ను అభివృద్ధి చేసి, ఇచ్చే విభాగంలోకి ప్రవేశిస్తున్నట్లు స్థిరాస్తి సంస్థ పూర్వాంకరా లిమిటెడ్‌ ప్రకటించింది. వచ్చే 6-7 నెలల్లో రూ.825 కోట్ల పెట్టుబడితో 6 ప్రాజెక్టులను ప్రారంభిస్తామని ఆ సంస్థ మేనేజింగ్‌ డైరెక్టర్‌ ఆశిష్‌ ఆర్‌.పూర్వాంకర తెలిపారు. ప్లాట్ల వ్యాపారానికి ప్రత్యేకంగా బ్రాండ్‌, జట్టును ఏర్పాటు చేసి ‘పూర్వా ల్యాండ్‌’ పేరుతో కార్యకలాపాలు సాగిస్తామన్నారు. బెంగళూరు, చెన్నై, కోయంబత్తూర్‌లలో 6 ప్రాజెక్టుల్లో 55 లక్షల చదరపు అడుగుల ప్లాట్లను విక్రయించడానికి సిద్ధమవుతున్నట్లు పేర్కొన్నారు. పుణె, ముంబయి, హైదరాబాద్‌లలో కూడా భూ యజమానులతో చర్చలు కొనసాగుతున్నాయని, వారు అంగీకరిస్తే సంయుక్తంగా ప్లాట్లను అభివృద్ధి చేస్తామని తెలిపారు.