Rolls Royce: కరోనా సమయంలో కూడా రోల్స్‌-రాయిస్‌ రికార్డుస్థాయి విక్రయాలు

లండన్‌: విలాసవంతమైన కార్ల తయారీ సంస్థ రోల్స్‌-రాయిస్‌ 2021లో భారీగా విక్రయాలను పెంచుకొంది. కరోనా ప్రభావం, సెమికండక్టర్స్‌ కొరత వంటివి కూడా రోల్స్‌ రాయిస్‌ దూకుడును ఆపలేకపోయాయి. గతేడాది మొత్తం విక్రయాలు 50శాతం పెరిగి 5,586కు చేరాయి. ముఖ్యంగా అమెరికా, ఆసియా-పసిఫిక్‌, గ్రేటర్‌ చైనా వంటి చోట్ల విక్రయాల్లో పెరుగుదల చోటు చేసుకొంది. రోల్స్‌-రాయిస్‌ ఘోస్ట్‌ కూపే కారుకు మంచి డిమాండ్‌ వచ్చింది. 2.5టన్నుల బరువున్న  కారు ధర 3,50,000 యూరోలు.

‘‘2021 రోల్స్‌-రాయిస్‌కు అద్భుతమైన సంవత్సరం. ఈ సంస్థ 117 ఏళ్ల చరిత్రలో ప్రపంచ వ్యాప్తంగా ఈ స్థాయి డెలివరీలు చేయలేదు. మా ఉత్పత్తులకు ఇంత డిమాండ్‌ చూడలేదు’’ కంపెనీ మోటార్‌ కార్స్‌ విభాగం సీఈవో టోర్‌స్టెన్‌ ముల్లర్‌ ఆట్‌వోస్‌ పేర్కొన్నారు. 1998లో రోల్స్‌-రాయిస్‌ను జర్మనీకి చెందిన బీఎండబ్ల్యూ కంపెనీ కొనుగోలు చేసింది. బ్రిటన్‌లోని కార్ల సంస్థలు మొత్తం 1.65 మిలియన్‌ వాహనాలను 2021లో ఉత్పత్తి చేసినట్లు ది సొసైటీ ఆఫ్‌ మోటార్‌ మ్యాన్‌ఫ్యాక్చరర్‌  అండ్‌ ట్రేడర్స్‌ ప్రకటించింది.