వ‌య‌వంద‌న యోజ‌న లేదా సీనియర్ సిటిజన్ సేవింగ్స్ స్కీమ్ ఏది ఎంచుకోవాలి ?

ప్రధాన మంత్రి వయ వందన యోజన (పీఎమ్‌వీవీవై), సీనియర్ సిటిజెన్ సేవింగ్స్ స్కీమ్ (ఎస్‌సీఎస్ఎస్‌) సీనియర్లకు స్థిర ఆదాయ ఎంపికలు. కేంద్ర ప్రభుత్వం రెండు పథకాలకు మద్దతు ఇస్తుంది, ఇతర సురక్షిత ఎంపికలతో పోలిస్తే దీర్ఘకాలికంగా మంచి రాబడిని అందిస్తాయి.

అయితే సీనియర్ సిటిజ‌న్లు రెండింటిలో ఏది ఎంచుకోవాలి?
సీనియ‌ర్ సిటిజ‌న్ సేవింగ్ స్కీమ్ వ‌డ్డీ 7.4 శాతం, పెట్టుబడి పెట్టగల గరిష్ట మొత్తం రూ .15 లక్షలు. ప్రతి త్రైమాసికంలో చెల్లింపు జరుగుతుంది.
 ప్ర‌ధాన‌మంత్రి వ‌య‌వంద‌న యోజ‌న‌లో వడ్డీ రేట్లు  ఎంచుకున్న‌ చెల్లింపు విధానం మీద ఆధారపడి ఉంటాయి. ఇందులో వ్యక్తి నెలవారీ, త్రైమాసిక, అర్ధ-వార్షిక లేదా వార్షిక పెన్షన్‌ను ఎంచుకోవ‌చ్చు.
పిఎంవీవీవై గరిష్ట వార్షిక పెన్షన్ రూ .1.11 లక్షలు ఉండాలి. పెన్షనర్లు నెలవారీ చెల్లింపును ఎంచుకుంటే, వారికి లభించే గరిష్ట పెన్షన్ రూ .9,250, దానికి వారు రూ .15 లక్షలు పెట్టుబడి పెట్టాలి. గరిష్టంగా వార్షిక చెల్లింపు రూ .1.11 లక్షలు, ఇందుకోసం సీనియర్ సిటిజ‌న్లు రూ .1,449,086 పెట్టుబడి పెట్టాలి.  వడ్డీ రేటు చెల్లింపు విధానాన్ని బ‌ట్టి 7.4 శాతం నుంచి 7.66 శాతం మధ్యలో ఉంటుంది.

రెండు పథకాలు 60 సంవ‌త్స‌రాలు, అంతకంటే ఎక్కువ వయస్సు ఉన్నవారికి వ‌ర్తిస్తాయి. అయితే సీనియ‌ర్ సిటిజ‌న్ సేవింగ్ స్కీమ్ కొన్ని సందర్భాల్లో వయస్సు సడలింపును అందిస్తుంది. ఉదాహరణకు, పదవీ విరమణ తీసుకున్న‌ ఒక నెలలోపు పెట్టుబడి పెట్టాలి అనే షరతుకు లోబడి, 55 ఏళ్లు పైబడిన, 60 ఏళ్లలోపు రిటైర్డ్ ఉద్యోగులు ఇందులో పెట్టుబడి పెట్టవచ్చు.
దీని గరిష్ట గ‌డువు ఐదు సంవత్సరాలు, పీఎంవీవీవైకి 10 సంవత్సరాలు. రెండింటిలో మెచ్యూరిటీకి ముందు ఖాతాలను మూసివేయవచ్చు. ఎస్‌సీఎస్ఎస్‌లో, సీనియర్లు ముందస్తు మూసివేతకు జరిమానా చెల్లించాలి. పీఎంవీవీవైలో, అయితే ముంద‌స్తుగా ఉప‌సంహ‌రించుకుంటే కొనుగోలు ధరలో 98 శాతం పొందుతారు.

రెండింటి మధ్య చాలా ముఖ్యమైన వ్యత్యాసం పన్ను ప్రయోజనం. ఎస్సీఎస్ఎస్ సెక్షన్ 80 సి కింద తగ్గింపుకు అర్హత ఉంటుంది. పీఎంవీవీవై కింద పన్ను మినహాయింపు అందుబాటులో లేదు. పీఎంవీవీవై నుంచి చెల్లింపు కూడా పన్ను పరిధిలోకి వస్తుంది. ఎస్సీఎస్‌ఎస్ నుంచి పొందిన‌ వడ్డీ ఆదాయంప కూడా సెక్షన్ 80 టిటిబి కింద పన్ను మినహాయింపు ఉంటుంది.

ఈ ఆదాయ ప‌న్ను సెక్ష‌న్‌ ప్రకారం, ఒక సీనియర్ స్థిర డిపాజిట్ల నుంచి (అర్హత కలిగిన బ్యాంకుల నుంచి) సంపాదించిన రూ .50,000 వ‌ర‌కు వడ్డీ ఆదాయంపై ప‌న్ను మిన‌హాయింపు ల‌భిస్తుంది.  చాలా అంశాలలో, వ‌య‌వంద‌న యోజ‌న  కంటే సీనియ‌ర్ సిటిజ‌న్ స్కీమ్ మెరుగ్గా అనిపిస్తోంది. అయితే, మీకు నెలవారీ చెల్లింపు కావాలంటే, వ‌య‌వంద‌న యోజ‌న‌ మంచిది.