స్కోడా ఆటో ఫోక్స్‌వ్యాగన్‌ ఇండియా ఎండీ రాజీనామా

దిల్లీ: ప్రముఖ వాహన తయారీ సంస్థ స్కోడా ఆటో ఫోక్స్‌వ్యాగన్‌ ఇండియా లిమిటెడ్‌(ఎస్‌ఏవీడబ్ల్యూఐపీఎల్‌) ఎండీ పదవికి గురుప్రతాప్‌ బొపరాయ్‌ రాజీనామా చేశారు. జనవరి 1, 2022 నుంచి ఆయన కంపెనీ నుంచి తప్పుకోనున్నారు. ఆయన స్థానంలో ప్రస్తుతం ఎస్‌ఏవీడబ్ల్యూఐపీఎల్‌ ఛైర్మన్‌గా ఉన్న క్రిస్టియన్‌ కాన్‌ తాత్కాలికంగా బాధ్యతలు స్వీకరించనున్నారు. త్వరలో గురుప్రతాప్‌ వారసుణ్ని ప్రకటిస్తామని కంపెనీ తెలిపింది. సంస్థ చేపట్టిన ఇండియా 2.0 ప్రాజెక్టును విజయవంతంగా అమలు చేయడంలో గురుప్రతాప్‌ కీలక పాత్ర పోషించారని పేర్కొంది. అలాగే స్కోడా ఆటో ఇండియా, ఫోక్స్‌వ్యాగన్‌ గ్రూప్‌ సేల్స్‌ ఇండియా, ఫోక్స్‌వ్యాగన్‌ ఇండియా పేరిట విడివిడిగా ఉన్న సంస్థలను విలీన ప్రక్రియ ద్వారా ఒకే గొడుగు కిందకు తీసుకురావడంలోనూ గురుప్రతాప్‌ నాయకత్వం సంస్థకు ఎంతగానో ఉపయోగపడిందని తెలిపింది. ఆయన ఏప్రిల్‌ 2018లో సంస్థలో చేరారు.