మ్యూచువ‌ల్ ఫండ్ల‌ డివిడెండుపైనే 10 శాతం టీడీఎస్‌

బడ్జెట్‌లో ప్రతిపాదించిన 10 శాతం మూలం వద్ద పన్ను కోత (టీడీఎస్‌) ప్రతిపాదన… మ్యూచువల్‌ ఫండ్లు చెల్లించే డివిడెండు చెల్లింపుపై మాత్రమే వర్తిస్తుందని, యూనిట్ల విక్రయంతో వచ్చే లాభాలపై కాదని ఆదాయపు పన్ను విభాగం స్పష్టం చేసింది. 2020-21 బడ్జెట్‌లో కంపెనీలు, మ్యూచువల్‌ ఫండ్ల డివిడెండుపై చెల్లించే డివిడెండు పంపిణీ పన్ను (డీడీటీ)ను రద్దు చేస్తున్నట్లు ఆర్థిక మంత్రి నిర్మలా సీతారామన్‌ ప్రకటించిన విషయం తెలిసిందే. దీని స్థానంలో కంపెనీలు లేదా మ్యూచువల్‌ ఫండ్లు చెల్లించే డివిడెండుపై 10 శాతం టీడీఎస్‌ను వసూలు చేయాలని ప్రతిపాదించారు. ఏడాదికి డివిడెండు లేదా ఆదాయం రూ.5000 మించితే ఈ మొత్తాన్ని వసూలు చేస్తారు. దీనిపై పలు సందేహాలు రావడంతో, తాజాగా సీబీడీటీ స్పష్టత ఇచ్చింది.