TVS Apache RR 310: మార్కెట్లోకి కొత్త అపాచీ.. మీరే డిజైన్‌ చేసుకోండి!

ఇంటర్నెట్‌ డెస్క్‌: దేశీయ ద్విచక్ర వాహన కంపెనీ తయారీదారు టీవీఎస్‌.. మరో కొత్త మోడల్‌ను మార్కెట్లోకి విడుదల చేసింది. తన విజయవంతమైన మోడల్‌ అపాచీ సిరీస్‌లో కొత్త అపాచీ ఆర్‌ఆర్‌ 310 2021ను తీసుకొచ్చింది. వాస్తవానికి ఏప్రిల్‌ నెలలోనే ఈ బైక్‌ విడుదల అవ్వాల్సి ఉండగా.. కొవిడ్‌ కారణంగా ఆలస్యమైంది. గతేడాది విడుదల చేసిన వెర్షన్‌తో పోలిస్తే కొన్ని కీలక మార్పులతో కొత్త వెర్షన్‌ను తీసుకొచ్చింది. ఈ బైక్‌ ధరను కంపెనీ రూ.2.59 లక్షలుగా (ఎక్స్‌ షోరూమ్‌) కంపెనీ నిర్ణయించింది.

టీవీఎస్‌ తొలిసారి బిల్డ్‌-టు- ఆర్డర్‌ (బీటీవో) విధానాన్ని తీసుకొచ్చింది. దీని ప్రకారం.. మీకు నచ్చినట్లుగా మీ బైక్‌ను డిజైన్‌ చేసుకోవచ్చు. టీవీఎస్‌ అరైవ్‌ యాప్‌/ వెబ్‌సైట్‌ ద్వారా మీకు నచ్చిన సదుపాయాలతో బైక్‌ను ఆర్డర్‌ చేయొచ్చు. కొద్దిరోజుల తర్వాత బైక్‌ను సమీప డీలర్‌ వద్ద పొందొచ్చు. ప్రతి నెలా 100 యూనిట్లను ఈ తరహాలో కంపెనీ ఉత్పత్తి చేయనుంది.

ఇక ఫీచర్ల విషయానికొస్తే.. ఈ బైక్‌లో 313 సీసీ ఇంజిన్‌ను అమర్చారు. ఇది 9,700 ఆర్‌పీఎం వద్ద 34 బీహెచ్‌పీని, 7,700 ఆర్‌పీఎం వద్ద 27.3 ఎన్‌ఎం టార్క్‌ను ఉత్పత్తి చేస్తుంది. 6 స్పీడ్‌ గేర్‌ బాక్స్‌ను అమర్చారు. బ్లూటూత్‌ కనెక్టివిటీతో పాటు అర్బన్‌, ట్రాక్‌, స్పోర్ట్, రెయిన్‌ వంటి రైడింగ్‌ మోడ్స్‌ను అమర్చారు. ఆర్‌సీ, డ్రైవింగ్‌ లైసెన్స్‌ వంటివి డిజిటల్‌గా దాచుకునేందుకు డిజి డాక్స్‌ సదుపాయాన్ని ఇస్తున్నారు. కేటీఎం ఆర్‌సీ 390కి ఈ బైక్‌ పోటీగా నిలవనుంది.