Fertilisers: దేశంలో ఎరువుల కొరత లేదు: కేంద్రం

దిల్లీ: దేశంలో ఎరువుల కొరత ఏమాత్రం లేదని కేంద్ర రసాయన, ఎరువుల శాఖ మంత్రి మన్సుక్‌ మాండవీయ తెలిపారు. కీలకమైన డీఏపీని కావాల్సిన మేరకు ఇప్పటికే సిద్ధం చేసి ఉంచినట్లు వెల్లడించారు. ఈ మేరకు లోక్‌సభలో ఓ సభ్యుడు అడిగిన ప్రశ్నకు శుక్రవారం లిఖిపూర్వక సమాధానం ఇచ్చారు.

రబీ సీజన్‌లో రాష్ట్ర ప్రభుత్వాలు 34.64 కోట్ల టన్నుల డీఏపీని కోరగా.. కేంద్ర రసాయన శాఖ 36.60 లక్షల టన్నులను అందుబాటులో ఉంచిందని తెలిపారు. అయినప్పటికీ రాబోయే సీజన్‌కు సరిపడా నిల్వలు ఉన్నాయన్నారు. రాష్ట్రాలకు 45 కేజీల యూరియాను రూ.242 గరిష్ఠ చిల్లర ధరకు అందిస్తున్నట్లు గుర్తుచేశారు. ఏప్రిల్‌-అక్టోబరు మధ్య 29.59 లక్షల టన్నుల డీఏపీని దిగుమతి చేసుకున్నట్లు వెల్లడించారు. ఈ ఏడాది మొత్తంలో 48.70 లక్షల టన్నుల డీఏపీ దిగుమతి అయినట్లు పేర్కొన్నారు.