Tesla Bot: టెస్లా నుంచి హ్యుమనాయిడ్‌ రోబో.. లక్ష్యం ఇదే!

వాషింగ్టన్‌: విద్యుత్తు కార్లు, అటానమస్‌ కార్ల తయారీలో తనదైన ముద్ర వేస్తున్న టెస్లా.. ఇక రోబోటిక్‌ రంగంలోకి ప్రవేశించబోతోంది. తమ సంస్థ నుంచి రాబోయే భవిష్యత్తు ‘హ్యుమనాయిడ్‌ రోబో’కు సంబంధించిన నమూనాను వచ్చే ఏడాది ప్రవేశపెడతామని సంస్థ సీఈఓ ఎలాన్‌ మస్క్‌ ప్రకటించారు. గురువారం జరిగిన ‘ఆర్టిఫిషియల్‌ ఇంటెలిజెన్స్‌ డే’ సందర్భంగా మాట్లాడుతూ ఆయన ఈ ప్రకటన చేశారు. ‘టెస్లా బోట్‌’గా పేర్కొంటున్న ఈ రోబోకు సంబంధించిన ప్రాథమిక వివరాలను వెల్లడించారు. మనుషులు చేయడానికి బోర్‌గా ఫీలయ్యే పనులను చేసేలా తమ ‘టెస్లా బోట్‌’ను రూపొందిస్తున్నామని ప్రకటించారు. కారుకు బోల్ట్‌లు బిగించడం, నిత్యావసర దుకాణాల్లో సరకులను తీసుకోవడం వంటి పనులు చేసేలా దీన్ని అభివృద్ధి చేస్తామన్నారు. ఈ రోబో ఆర్థిక వ్యవస్థపై తీవ్ర ప్రభావం చూపనుందని మస్క్‌ తెలిపారు. శ్రామికుల కొరతను ఇది తీరుస్తుందన్నారు. అయితే, దీన్ని అందుబాటు ధరలో తయారు చేయడం అన్నింటికంటే ముఖ్యమైన అంశమన్నారు.