Dish TV AGM: సుభాష్‌ చంద్ర కుటుంబానికి పరీక్షా సమయం..!

ఇంటర్నెట్‌డెస్క్‌: డిష్‌ టీవీ 33వ వార్షిక సమావేశం(ఏజీఎం) రేపు జరగనుంది. ఇప్పటికే సుభాష్‌ చంద్ర నేతృత్వంలోని ప్రమోటర్లు.. యస్‌బ్యాంక్‌ మధ్య వివాదం కారణంగా  రెండు సార్లు ఈ సమావేశం వాయిదా పడిన విషయం తెలిసిందే. ఈ సమావేశంలో డిష్‌టీవీ యాజమాన్యం అశోక్‌ కురియన్‌ను మరోసారి బోర్డులో నియమించాలని కోరింది. కంపెనీ బోర్డును పునర్‌ వ్యవస్థీకరించాలని యస్‌బ్యాంక్‌ లిమిటెడ్‌ నుంచి నోటీసులు అందుకొంది. ఈ క్రమంలో ఎండీ జవహర్‌ గోయల్‌ మరో కొందరు డైరెక్టర్లను తొలగించాలని డిమాండ్‌ చేసింది.

ఈ వివాదం ముంబయి ఎన్‌సీఎల్‌టీ వద్దకు వెళ్లింది. యస్‌బ్యాంక్‌ ఓటింగ్‌ హక్కులపై స్టే విధించాలన్న డిష్‌టీవీ విన్నపంపై ఎన్‌సీఎల్‌టీ ఎటువంటి ఉత్తర్వులు జారీ చేయలేదు. ప్రస్తుతం యస్‌బ్యాంక్‌కు డిష్‌టీవీలో 24.19శాతం వాటా ఉంది. ఈ నేపథ్యంలో రేపు జరగబోయే వాటాదారుల సమావేశం కీలక పాత్ర పోషించనుంది. ఈ సమావేశంలో కంపెనీ ఆర్థిక పరిస్థితులు వెల్లడించడంతోపాటు.. నాన్‌ ఎగ్జిక్యూటీవ్‌, నాన్‌ ఇండిపెండెంట్‌ డైరెక్టర్‌ అశోక్‌ కురియన్‌ పునర్నియామకం, ఆడిటర్లకు చెల్లింపులు వంటి అంశాలను ప్రస్తావించనున్నారు.