మూలధన సేకరణకు తక్షణ ప్రణాళికలేమీ లేవు

 ఎస్‌బీఐ ఛైర్మన్‌ దినేశ్‌ కుమార్‌ ఖారా

దిల్లీ: గత ఆర్థిక సంవత్సరంలో మంచి లాభాలు ఆర్జించిన నేపథ్యంలో, మూలధన సమీకరణ కోసం తక్షణ  ప్రణాళికలు ఏమీ రూపొందించల స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) ఛైర్మన్‌ దినేశ్‌ కుమార్‌ ఖారా వెల్లడించారు. వ్యాపార వృద్ధికి ఆ మొత్తాన్నే వినియోగిస్తామని పేర్కొన్నారు. ‘గతంలో టైర్‌-1, టైర్‌-2 బాండ్ల ద్వారా నిధులు సమీకరించాం. గత ఏడాది వృద్ధిని పరిగణలోకి తీసుకుంటే, సౌకర్యవంతమైన మూలధన కనీస నిష్పత్తి ఉంది. ఈ ఏడాదిలో వ్యాపార వృద్ధికి అవసరమైన వనరులు ఉన్నాయ’ని దినేశ్‌ వెల్లడించారు.
* ఎస్‌బీఐ లైఫ్‌లో కార్లిలే గ్రూప్‌ 4% వాటా విక్రయం
ప్రైవేటు ఈక్విటీ సంస్థ కార్లిలే గ్రూప్‌, ఎస్‌బీఐ లైఫ్‌ ఇన్సూరెన్స్‌లో తమకున్న 4 శాతం వాటాను రూ.3,900 కోట్లకు ఓపెన్‌ మార్కెట్‌ లావాదేవీ ద్వారా విక్రయించినట్లు తెలిపింది. బీఎస్‌ఈ వద్ద ఉన్న సమాచారం మేరకు, కార్లిలే గ్రూప్‌ తమ సీఏ ఎమరాల్డ్‌ ఇన్వెస్ట్‌మెంట్‌ ద్వారా 4.1 కోట్ల ఎస్‌బీఐ లైఫ్‌ షేర్లను విక్రయించింది.