యూనిట్‌ ఆధారిత ఆరోగ్య బీమా పాలసీలు

సాధారణ ఆరోగ్య బీమా పాలసీల్లో హామీ ఇచ్చిన మేర సొమ్మును చెల్లించే ఏర్పాట్లు చేస్తాయి బీమా కంపెనీలు. ఆ పరిమితికి మించి ఖర్చైనా, బీమా వర్తించని ఆరోగ్య సమస్యలెదురైనా లేదా వెయిటింగ్‌ పీరియడ్‌ పూర్తి కాని అనారోగ్య సమస్యలకు సంబంధించిన ఇతర ఖర్చులకు పాలసీదారుడు తన చేతి నుంచి ఖర్చు చేయాల్సి ఉంటుంది. ఈ పరిమితులను అధిగమించేందుకు ఆరోగ్య బీమాతో పాటు పెట్టుబడులను సైతం ప్రోత్సహించేవే యూనిట్‌ ఆధారిత ఆరోగ్య బీమా పాలసీలు(యూఎల్‌హెచ్‌పీ).

సాధారణ ఆరోగ్య బీమా పాలసీల్లానే ఆసుపత్రిలో చేరితే అయ్యే ఖర్చులు, నర్సింగ్‌ ఖర్చులు, అంబులెన్స్‌కు, వైద్యుడి కన్సల్టేషన్‌ ఫీజు లాంటి వాటికి ఈ యూఎల్‌హెచ్‌పీ బీమా అందిస్తుంది.

ముఖ్యమైన అంశాలు:

• ఈ పాలసీలు ఒకే వ్యక్తి తీసుకోవచ్చు లేదా కుటుంబమంతటికీ కలిపి ఫ్యామిలీ ఫ్లోటర్‌గానూ పొందొచ్చు.

• ఈ పాలసీలో హాస్పిటల్‌ క్యాష్‌ బెనిఫిట్‌ అంటే ఆసుపత్రిలో చేరి వైద్యం చేయించుకుంటే అయ్యే ఖర్చులు, శస్త్రచికిత్సలకయ్యే (సర్జికల్‌ బెనిఫిట్‌) ఖర్చులు చెల్లిస్తారు.

• హాస్పిటల్‌ క్యాష్‌ బెనిఫిట్‌ను బట్టి పాలసీలో ప్రీమియాన్ని నిర్ణయిస్తారు.

• ప్రీమియంలో కొంత భాగం బీమాకు కేటాయించి మిగిలిన మొత్తాన్ని మార్కెట్‌లో పెట్టుబడుల్లో పెడతారు.

• ఈ పెట్టుబడులు వ్యక్తి వయసు, నష్టభయం తట్టుకునే శక్తిని బట్టి మారుతూ ఉంటాయి. ఎంత మేరకు ఈక్విటీల్లో లేదా ఎంత మేరకు డెట్‌ పథకాల్లో పెట్టుబడులు పెట్టాలో నిర్ణయించుకునే వీలు పాలసీదారుడికి ఉంటుంది.

• వీటిలో ఫండ్‌ మేనేజర్లు, పెట్టుబడులకు నిర్వహణ ఛార్జీలు విధిస్తారు.

• ఈ పాలసీలకు లాక్‌ ఇన్‌ పీరియడ్‌ ఉంటుంది. ఆ సమయం పూర్తయ్యే వరకు పెట్టుబడులను ఉపసంహరించుకునేందుకు వీల్లేదు.

• ఈ పాలసీలు పెట్టుబడులతో కూడుకున్నవి కాబట్టి వీటికి స్వాధీన విలువ ఉంటుంది. అయితే ఈ విలువ వచ్చేందుకు నిర్ణీత కాలపరిమితి ఉంటుంది.

• బీమా వ్యవధి ముగిశాక పెట్టుబడులు, వాటిపై వచ్చే బోనస్‌ను కలిపి పాలసీదారుకు అందిస్తారు.

ప‌రిమితులుః

• యూఎల్‌హెచ్‌పి పాలసీలు, ప్రస్తుతం అందుబాటులో ఉన్న యూలిప్‌ పాలసీలు నగదురహిత సదుపాయాన్ని అందించడం లేదు.

• ఈ పాలసీలపై నో క్లెయిం బోనస్‌ వర్తించదు.

• ఆసుపత్రిలో చేరి కనీసం రెండు రోజుల పాటు చికిత్స తీసుకుంటేనే బీమా వర్తిస్తుంది.

• నెట్‌వర్క్‌ ఆసుపత్రులు ఈ పాలసీలో అందుబాటులో లేవు కాబట్టి ఈ విషయాలను దృష్టిలో ఉంచుకొని పాలసీని ఎంచుకోవడం మంచిది.

పన్ను మినహాయింపు

ఈ పాలసీలు ఆదాయపు పన్ను చట్టం సెక్షన్‌ 80 సీ, 80 డీ పరిధిలోకి వస్తాయి.

బీమాను, పెట్టుబడులను విడివిడిగా చూడమని ఆర్థిక నిపుణులు సూచిస్తారు. ఓ సమగ్ర ఆరోగ్య బీమా కలిగి ఉండి, ఆ బీమా పరిమితికి మించి అయ్యే ఖర్చులకు, పాలసీ వర్తించని అనారోగ్య సమస్యలకు అదనపు సొమ్ము అవసరమవుతుందనుకుంటే ఆరోగ్య అవసరాలకు అత్యవసర నిధిని ఏర్పాటుచేసుకోవడం మంచిది. ఈ నిధిని నష్టభయం తక్కువ ఉండి వెంటనే ఉపసంహరించుకునే వీలున్న పథకాల్లో పెట్టుబడి పెడితే అత్యవసర పరిస్థితుల్లో ఉపయోగపడుతుంది.