Vistara: నేరుగా దిల్లీ నుంచి ప్యారిస్‌కు.. విస్తారా విమాన సేవలు!

దిల్లీ: దేశ రాజధాని దిల్లీ నుంచి నేరుగా ఫ్రాన్స్‌ రాజధాని ప్యారిస్‌కు చేరుకునేలా ప్రముఖ విమానయాన సంస్థ విస్తారా సేవల్ని ప్రారంభించింది. ప్రతి ఆదివారం, బుధవారం నడిచే ఈ విమానం ఎక్కడా ఆగకుండా నేరుగా ప్యారిస్‌ చేరుకుంటుంది. కరోనా నేపథ్యంలో భారత్‌ ఫ్రాన్స్‌ మధ్య ‘ఎయిర్‌బబుల్‌ ఒప్పందం’లో భాగంగా ఈ సేవల్ని ప్రారంభించారు. దిల్లీలోని ఇందిరా గాంధీ అంతర్జాతీయ విమానాశ్రయం నుంచి ప్యారిస్‌లోని చార్లెస్‌ డీ గల్లే ఎయిర్‌పోర్టుకు విస్తారాకు చెందిన బోయింగ్‌ 787-9 (డ్రీమ్‌లైనర్‌) విమానం చేరుకోనుంది.

ఇప్పటి వరకు నేరుగా ఎక్కడా ఆగకుండా.. లండన్‌, దుబాయ్‌, దోహా, షార్జా, మాలేకు మాత్రమే భారత్‌ నుంచి విమానాలు నడుస్తున్నాయి. టాటా సన్స్‌-సింగపూర్‌ ఎయిర్‌లైన్స్ సంయుక్తంగా నిర్వహిస్తున్న విస్తారా చేసుకున్న ఒప్పందం వల్ల తాజాగా ఈ జాబితాలో ప్యారిస్‌ కూడా చేరింది. ఇరు దేశాల మధ్య ఉన్న బలమైన సాంస్కృతిక, ఆర్థిక సంబంధాల వల్ల దిల్లీ-ప్యారిస్‌ మధ్య తరచూ ప్రయాణాలు జరుగుతుంటాయని విస్తారా సీఈఓ లెస్లీ థంగ్‌ తెలిపారు.