Mukesh Ambani: ముకేశ్‌ అంబానీ గ్యారేజీలోకి కొత్త కారు.. ధరెంతో తెలుసా?

ముంబయి: రిలయన్స్‌ ఇండస్ట్రీస్‌ (ఆర్‌ఐఎల్‌) అధిపతి ముకేశ్‌ అంబానీ తాజాగా అత్యంత విలాసవంత రోల్స్‌రాయిస్‌ కలినన్‌ హ్యాచ్‌బ్యాక్‌ కారును రూ.13.14 కోట్లతో కొనుగోలు చేసినట్లు తెలుస్తోంది. ఆర్‌టీఓ అధికారుల సమాచారం ప్రకారం.. దేశంలోనే అత్యంత ఎక్కువ ధర కార్ల కొనుగోళ్లలో ఇదీ ఒకటి. దక్షిణ ముంబయిలోని తార్డియో ప్రాంతీయ రవాణా కార్యాలయంలో జనవరి 31న ఈ కారును నమోదు చేయించారు. 2018లో ఈ కారును ఆవిష్కరించినపుడు దీని ప్రాథమిక ధర రూ.6.95 కోట్లు.  వ్యక్తిగతంగా తమకిష్టమైన మార్పులను కోరిన పక్షంలో (కస్టమైజ్డ్‌) ధర భారీగా పెరుగుతుందని పరిశ్రమ నిపుణులు అంటున్నారు. 2.5 టన్నుల బరువుండే ఈ 12 సిలిండర్‌ కారు 563 బీహెచ్‌పీ శక్తిని ఉత్పత్తి చేస్తుంది.  ‘టస్కన్‌ సన్‌’ రంగులోని ఈ కారుకు ‘0001’ నెంబరును పొందడం కోసం రూ.12 లక్షలను కంపెనీ ఖర్చు చేసింది. 2037 జనవరి 30 వరకు రిజిస్ట్రేషన్‌ వర్తించేలా ఒకేసారి చెల్లించే(ఒన్‌ టైం) పన్ను కింద రూ.20 లక్షలు; రోడ్డు భద్రత పన్ను కింద రూ.40,000ను ఆర్‌ఐఎల్‌ చెల్లించిందని వారు తెలిపారు.