Akasa Air: 10 నుంచి విశాఖ- బెంగళూరు రూట్‌లో ఆకాశ ఎయిర్‌ సేవలు

ముంబయి: దేశీయ విమానయాన సంస్థ ఆకాశ ఎయిర్‌ (Akasa Air) త్వరలో విశాఖ నుంచి తన విమాన సర్వీసులు ప్రారంభించబోతోంది. విశాఖ-బెంగళూరు మధ్య సర్వీసులు నడపనుంది. డిసెంబర్‌ 10 నుంచి ఈ సేవలు ప్రారంభమవుతాయని ఆ విమానయాన సంస్థ ఓ ప్రకటనలో తెలిపింది. ఈ ఏడాది ఆగస్టులో కార్యకలాపాలు ప్రారంభించిన ఆకాశ ఎయిర్‌.. తన పదో గమ్యస్థానంగా విశాఖ నుంచి ఈ సేవలు ప్రారంభించబోతోంది.

విశాఖ- బెంగళూరు మార్గంలో రోజుకు రెండేసి సర్వీసులు నడవనున్నాయి. డిసెంబర్‌ 10న తొలి సర్వీసు.. 12 నుంచి రెండో సర్వీసును ప్రారంభించనున్నట్లు కంపెనీ ఓ ప్రకటనలో తెలిపింది. ఈ సేవల ప్రారంభించడం ద్వారా బెంగళూరు నుంచి 8 నగరాలకు రోజుకు 24 నాన్‌స్టాప్‌ సర్వీసులను ప్రారంభించినట్లు అవుతుందని తెలిపింది. మొత్తం 10 గమ్యస్థానాల్లో 8 నగరాలు బెంగళూరుతో అనుసంధానం అవుతున్నాయి.

మరోవైపు నవంబర్‌ 26 నుంచి పుణె- బెంగళూరు మధ్య రెండు సర్వీసులు చొప్పున నడపనున్నట్లు ప్రకటించిన ఆకాశ ఎయిర్‌.. డిసెంబర్‌ 10 నుంచి మూడో సర్వీసును ప్రారంభించనున్నట్లు తెలిపింది. భారీ డిమాండ్‌ దృష్ట్యా డిసెంబర్‌ 17 నుంచి బెంగళూరు- అహ్మదాబాద్‌ మధ్య మూడో సర్వీసును ప్రారంభించబోతున్నట్లు పేర్కొంది.