Amazon: ఖర్చుల్ని తగ్గించుకోవడం కోసమే.. ఉద్యోగాల కోతల్ని సమర్థించుకున్న అమెజాన్‌!

వాషింగ్టన్‌: భారీ సంఖ్యలో ఉద్యోగుల్ని తొలగించడాన్ని అమెజాన్‌ సీఈఓ ఆండీ జస్సీ మరోసారి సమర్థించుకున్నారు. ఆర్థిక అస్థిరత నేపథ్యంలో ఖర్చుల్ని తగ్గించుకోవడంలో భాగంగానే ఈ నిర్ణయం తీసుకోవాల్సి వచ్చిందని తెలిపారు. న్యూయార్క్‌ టైమ్స్‌ గురువారం నిర్వహించిన ఓ సమావేశంలో మాట్లాడుతూ ఆయన ఈ వ్యాఖ్యలు చేశారు.

కరోనా వెలుగులోకి వచ్చిన తొలిరోజుల్లో అమెజాన్‌ రిటైల్‌ వ్యాపారం వేగంగా వృద్ధి చెందిందని జస్సీ తెలిపారు. దీంతో మౌలిక వసతుల ఏర్పాటుకు పెద్ద ఎత్తున ఖర్చు చేసేలా అప్పటి పరిస్థితులు ప్రోత్సహించాయని పేర్కొన్నారు. అంత వేగంగా నిర్ణయాలు తీసుకుంటామని తాము ఎప్పుడూ ఊహించలేదన్నారు. ఈ విషయంలో కొంత తొందరపడుతున్నామనే విషయం తమకు అప్పుడే అర్థమైందన్నారు. కానీ, తప్పలేదని తెలిపారు.

ఎంత మంది ఉద్యోగుల్ని తొలగించనుందనే విషయాన్ని అమెజాన్‌ ఇప్పటి వరకు ఎక్కడా అధికారికంగా వెల్లడించలేదు. కానీ, 10,000 మందికి ఉద్వాసన పలికే అవకాశం ఉందని విశ్వసనీయ వర్గాలను ఉటంకిస్తూ గతంలో మీడియాలో కథనాలు వచ్చాయి. అయితే, తొలగింపులు ప్రారంభమైనట్లు మాత్రం కంపెనీ ధ్రువీకరించింది. 2023లోనూ ఉద్యోగాల కోతలు కొనసాగుతాయని ఇటీవలే జస్సీ స్పష్టం చేశారు. ఆయా విభాగాధిపతులే ఉద్యోగులకు ఎప్పటికప్పుడు సమాచారాన్ని అందజేస్తారని తెలిపారు.