Life insurance: పన్ను ఆదా కోసం జీవిత బీమా కొనుగోలు చేస్తున్నారా?

ఇంటర్నెట్‌ డెస్క్‌: సాధారణంగా ప్రతి ఆర్థిక సంవత్సరం చివరి త్రైమాసికంలో బీమా ఎక్కువగా అమ్ముడవుతుంటాయి. దీనికి కారణం చాలా మంది పన్ను చెల్లింపుదారులు.. పన్ను తగ్గించుకోవడం కోసం చివరి నిమిషంలో బీమా పాలసీల్లో పెట్టుబడి పెడుతుంటారు. ఈ విధంగా చేయడం వల్ల పన్ను మాట పక్కన పెడితే.. పాలసీలు ఏమాత్రం అనుకూలంగా ఉండకపోగా ఎక్కువ ఖరీదైనవిగా మారతాయి. అందువల్ల పాలసీలను కొనుగోలు చేసేటప్పుడు పన్ను మాత్రమే కాకుండా ఈ కింది అంశాలను కూడా పరిగణనలోకి తీసుకోవాలి.

కవరేజీ..

‘జీవిత బీమా’ అనే పదం వివిధ రకాల పాలసీలకు ఉపయోగిస్తుంటారు. ఇందులో టర్మ్‌, ఎండోమెంట్‌, మనీబ్యాక్‌, యులిప్ ఇలా చాలా రకాలు ఉంటాయి. మీరు కుటంబ ఆర్థిక భద్రత కోసం జీవిత బీమా కొనుగోలు చేస్తున్నట్లయితే తక్కువ ప్రీమియంతో ఎక్కువ కవరేజీ లభించే పాలసీల కోసం చూడాలి. వార్షిక ఆదాయానికి కనీసం 10 రెట్లు లేదా కుటుంబ నెలవారీ ఖర్చులకు కనీసం 300 రెట్లు సమానమైన కవరేజీని పొందగలిగే పాలసీ ఉండాలి. అప్పుడే ఏదైనా దురదృష్టమైన సంఘటన జరిగితే, జీవిత బీమా పాలసీ కుటుంబానికి ఆర్థికంగా అండగా నిలుస్తుంది.

బీమా, పెట్టుబడుల కలయికతో వద్దు..

కొన్ని జీవిత బీమా పాలసీలు బీమా, పెట్టుబడుల కలయికతో వస్తాయి. ఎండోమెంట్‌, మనీబ్యాక్‌, యులిప్ పాలసీలను ఉదాహరణలుగా చెప్పుకోవచ్చు. ఈ పాలసీలలో బీమా కవరేజీకి ఎక్కువ ప్రాధాన్యం ఉండదు. బీమా ప్రీమియంకు చాలా తక్కువ మొత్తం కేటాయించి, మిగిలినది ఇతర పథకాల్లో పెట్టుబడి పెడుతుంటాయి. బోనస్‌లు, గ్యారెంటీ జోడింపులతో ఆకర్షిస్తుంటాయి. అయితే ఇవన్నీ జోడించినా కూడా రాబడి సాధారణంగా 5-6% కంటే ఎక్కువ ఉండదు. కాబట్టి అటు బీమా హామీ విషయంలో గానీ, ఇటు రాబడి విషయంలో గానీ ఎక్కువ ప్రయోజనం పొందలేరు. 

ఏక మొత్తంగా లేదా విడతలుగా హామీ మొత్తం..

బీమా చేసిన వ్యక్తి మరణిస్తే.. మరణ ప్రయోజనాన్ని నామినీకి అందిస్తారు. ఒకవేళ పాలసీ కాలవ్యవధి పూర్తయ్యే వరకు పాలసీదారుడు జీవించి ఉంటే.. మెచ్యూరిటీ ప్రయోజనాలను చెల్లిస్తారు. పాలసీ ప్రయోజనాలు ఎప్పుడు, ఏవిధంగా (ఏక మొత్తంగా, విడతలుగా) చెల్లిస్తారో తెలుసుకోవడం ముఖ్యం. హామీ మొత్తం ఒకేసారి, నెలవారీ పొందొచ్చు లేదా పిల్లల విద్య, వివాహం వంటి ముఖ్యమైన సందర్భాల్లో అందేలా ఏర్పాటు చేసుకోవచ్చు.

సరెండర్‌ విలువ..

పాలసీ మెచ్యూరిటీ కంటే ముందే, పాలసీ స్వచ్ఛందంగా వెనక్కి ఇచ్చేస్తే పొందే మొత్తాన్ని సరెండర్‌ విలువ అంటారు. అన్ని రకాల పాలసీలకు ఈ సౌకర్యం ఉండదు. అలాగే పాలసీని అనుసరించి, బీమా సంస్థను అనుసరించి సరెండర్‌ విలువ మారుతుంటుంది. పాలసీ తీసుకునేటప్పుడే సరెండర్‌ విలువను తెలుసుకోవాలి. 

పన్ను దాటి అవసరాలకు అనుగుణంగా పాలసీ..

జీవిత బీమా పాలసీకి చెల్లించే ప్రీమియంపై పన్ను ఆదా చట్టం 80సి కింద రూ.1.50 లక్షల వరకు పన్ను ఆదా చేసుకోవచ్చు. అయితే సెక్షన్‌ 80సి కిందకి పీపీఎఫ్‌, ఎస్‌ఎస్‌వై, ఈపీఎఫ్‌, సీనియర్‌ సిటిజన్‌ సేవింగ్స్‌ స్కీమ్‌, ఎన్‌పీఎస్‌, గృహ రుణ అసలు చెల్లింపులు వంటివి కూడా వస్తాయి. కాబట్టి జీవిత బీమా కొనుగోలులో పన్ను మినహాయింపు అదనపు ప్రయోజనంగా మాత్రమే చూడాలి. 

చివరిగా..

జీవిత బీమా కొనుగోలు చేసేటప్పుడు ప్యూర్‌ టర్మ్‌ పాలసీకి ప్రాధాన్యం ఇవ్వడం మంచిది. దీంతో తక్కువ ప్రీమియంతో ఎక్కువ హామీ మొత్తం పొందొచ్చు. అలాగే ప్రీమియంపై పన్ను ఆదా చేసుకోవచ్చు. మిగిలిన మొత్తాన్ని మ్యూచువల్‌ ఫండ్లలో పెట్టుబడి పెడితే దీర్ఘకాలంలో 10-12% రాబడిని కూడా పొందొచ్చు.